" የስራ… ሀ ሁ"

"የ ስ ራ ……  ሀ ሁ"
#ሳteናw

…  እነ ዲኬቲ ኢትዮጲያ በየጎዳናው በሚቆሙ ቢልቦርድ ምርታቸውን ለሚያስተዋውቁላቸው ሞዴሎች በሚልዮን የሚቆጠር ብር በሚከፍሉበት ምድር፣ አሰሪዬ ቶፊቅ ቆንጆዎችን ያለክፍያ በዘዴ እንደ ተንቀሳቃሽ ቢል ቦርድ የመጠቀም ሃሳቡን አድንቄለት!!) ወዳዘዘኝ ተግባር ወዲያው ተሰማራው…
••••••••••••••••••••••••••••••••••••••••••••

    ሃያኛው ክ/ዘ ተጠናቆ ሃያ አንደኛው ክ/ዘ 2ሺ ሚሊኒየም ገባ። 99 ላይ የወሰድኩትን የማትሪክ ፈተና ውጤት … ቤተሰብ የፕሪፕ ነጥብ ካላመጣህ በዛው ንካው ከሚል ማስጠንቂያ ጋር  በፆም በፀሎት ብጠብቅም አልተሳካም። …  ፈተና በማጥናት እንጂ በጠሎት ብቻ እንዳልሆነ የሚያስገነዝበኝን ሆኖ ውጤቱ ወጣ። ውጤቱ ለፕሪፕም ሆነ ለቤት መግቢያነት ስላላበቃኝ። መጀመሪያ መቀመጫዬን… በሚለው ብሂል መሰረት ፕሪፑን ትቼ ቤት በሽማግሌ ገባው።(ምናለ የመሰናዶ ትምህርትም በሽምግልና ቢገባ?)። የመጣልኝ ነጥብ ለአንድ አመት በሰርተክፌት መርሃ ግብር በሙያ ኮሌጅ ያስቀጥለኝ ነበርና ይህን ብዬ የሙያ ኮሌጅ መግቢያ ፎርም ሞላው። አስገባው። በየተመደባችሁበት ኮሌጅ ስማችሁ ይለጠፋል ጠብቁ ተባልን።… በዛን ሰሞን በምድሪቷ የሞላው ወሬ ስለ ሚሊኒየም ነበር። 99 ዓ/ም አመቱ ሙሉ የተወራለት፣ ሚሊኒየም በአንድ ቀን ጀንበር አልቆ ተገባደደ። ከዛ ቡሃላ በአንድ ሰሞን ወረት የነበረው ሚሊኒየም ቀስ በቀስ  እየደበዘዘ እየደበዘዘ "ምንምየለም" ሆኖ አረፈው። ዛሬ ላይ ቆሜ ሳስተውለው ከሚሊኒየም ያተረፍነው ነገር ቢኖር፣ የመንገድ መስፋትን፣ የኑሮ ውድነትን፣ የስራ ማጣትንና፣ ከተኖረበት ቀዬ በልማት ሰበብ መፈናቀልን ሆነ። እርግጥ ነው መልሶ ማልማት ከሀገር እድገት ቢመደብም፣ ህዝቤ በኑሮ ውድነት ቀን በቀን ኪሎው እየቀነሰና በቁም እየፈረሰ የድንጋይ ድርዳሮ ማቆምምና ማንጠፍ ብቻውን የሀገር ዕድገት መሆኑ ያጠራጥራል። ምክኒያቱም ሀገር ማለት ህዝም ጭምር እንጂ ምድርና ሰማዩ ብቻ አይደለም። እድገት የሚባለውም ህዝቡም ልማቱም ተያይዘው እኩል በእድገት ጎዳና ሲጓዙ እንጂ፣ ልማቱ ብቻውን እየኮበለለ ህዝቡ በጠኔ እየተንጓለለ እለመሆኑን ለማወቅ ሊቅ መሆን አያሻም። የሆነው ሆኖ ሚሊኒየም ገብቶ ምንም የለም ኑሮ ተጀመረ።

   የኮሌጁ ደልድድ ተለጥፏል የተባለ ቀን በመረጡልኝ ኮሌጅ በር ሄጄ ከተለጠፈው ስምና የትምህርት ዘርፍ ላይ ስሜን መፈለግ ጀመርኩ። የስሙ መብዛት የኢትዮጲያ ተማሪ በሙሉ ወደዚህ ኮሌጅ የተመደበ ያስመስለው ነበር። ቆይ ይህን ሁሉ ተማሪ ሊያስተምሩት ነው ወይስ የምርጫ ካርድ ሊሰጡት?። (ከብዛት ጥራት የሚለው የመርካቶ ሰፈሬ ቋንቋ እዚህ ኮሌጅ አይሰራም።) ስሜን ፈለኩ… ፈለኩ… ስሜን አጣሁት። ረስተውኝ ይሆን እንዴ? መፈለጉ ታክተኝ… ድሮም ትዕግስት የሚባል ነገር አልፈጠረብኝም!! እዚህ ስሜን ስፈልግ ከምውል … ለምን መርካቶ ገብቼ ዕጣ ፈንታዬን አልፈልግም አልኩና ኮሌጁን ትቸው መርካቶ ከሚገኘው ቤት መጣው። የያዝኩትን የማትሪክ ሰርተክፌት የሰው መሳቂያ እንዳያደርገኝ ብዬ የሰው ዘር ከማይደርስበት ስፍራ አስቀመጥኩት። የግል ኮሌጅ ወይም የርቀት ትምህርት እንድቀጥል ከቤተሰብ ሀሳብ ቀረበ። አልተስማማሁም። የትምህርት ሀፒታይቴን ስለማውቅ ሰበብ አስባብ ፈጥሬ ሀሳቡን ውድቅ አደረኩት። ከትምህርት ጋር እንኳን ርቄው በክፍል ውስጥ የመጀመሪያ ወንበር ላይ ተቀምጬም አልተስማማንም። ካደኩባት መርካቶ… ከዙሪያዋ ካለው የንግዱ ማህበረሰብ ለመቀላቀል ጊቢ በር ላይ የስራ ያለህ በሚመስል ሁኔታ ቆሜ መዋል ጀምርኩ። ከሚሊኒየም ቡሃላ አመቱ ከ365 ቀናት ወደ 36.5 ቀናት የተቀየረ እስኪመስለኝ ድረስ ፈጠነበኝ። በመቆም ብቻ ከእድሜዬ አንዷን አመት እንደ ቀልድ ቁርጥምጥም አድርጌ በላኋት። አንድ አመት ተምሬ የሙያ ኮሌጅ ሰርተክፌት ባይሰጠኝም፣ አንድ አመት በመቆም ቋሚው የሚል የማይታይ የማይዳሰስ ሰርተክፌት ከማህበረሰቤ ተሰጠኝ። (እንዴት መርካቶ እየዋልክ አመት ሙሉ ስራ አጣህ? የሚል ጥያቄ ካነሳህ… መርካቶ የጓዳ ሚስጥሯን አውቆና ንቆ ላደገባት ሳይሆን፣ ስራ ሳይንቅ ለሰራባት መጤ የምትቤዥ ስለሆነች ነው የአባይን ልጅ ውሃ ጠማው፣ የሚባለው ተረት በተግባር እንድተውን ተመርጬም ሊሆንም ይችላል። አባይንስ ስለናቅነው አልነበር ልጁን በጥም ቆልቶ፣ የባዳውን ጥም ያረካው?)

    አንድ አመት ያለ ስራ መቆሜን የታዘበው እንድ ሰው በቆምኩበት መጣና…" አንተ ሰው እዚህ ቆመህ ከምትውል እኔ ጋር በክፍያ ቆመህ የምትሰራውን ስራ ብሰጥህ አይሻልም?" ሲለኝ ተስማማሁና በሚሰራው የባዛር ስራ ላይ እቃ ሻጭ አድርጎ ቀጠረኝ። በዚህ መሰረት በአዲስ አበባ ኢግዝቢሽን ሟ ማዕከል በተዘጋጀው የገና ባዛር ዝግጅት ላይ አሰሪዬ በግሉ ተሳትፎ በካሬ 70 ብር የተከራያትን ጊዚያዊ የድንኳን ሱቅ ውስጥ በመቆም የስራ… ሀሁ  ጀመርሁ…

   ለ10 ቀን በኢግዚቢሽን ማዕከል ባሳለፍኩት ጊዜ ከስራ ልምድ ባሻገር ብዙ ነገር ታዘብኩ … ሐበሾች ምን ያህል ከሌላው አለም የተለየን ቆንጆዎች መሆናችንን ለመረዳት ዕድሉ ፈጠረልኝ። (ቆይ ግን ሐበሾች እንዲህ ቆንጆ ነን እንዴ? ቆንጆዎች በበዙበት ቦታ ነው ቁንጅናችን ጎልቶ የሚታየው? ወይስ ባዛር ሲመጣ ችግር መከራውን ሸፍኖ ያለ የሌለ የክት ልብሱን ተጎናፅፎ እንደደላው ሆኖ ስለሚታይ ነው?)። የባዛሩ አዘጋጅ ኮሚት በግል ሆነ በድርጅት ለተሳተፉ መግቢያ መውጫ ባጅ አዘጋጅቶ ነበር። ታዲያ ከባዛሩ ጊቢ ለአንድ ነገር ወጥተህ ስትመለስ ወደ ባዛሩ ጊቢ ለመግባት በተሰለፉ የአዲስ አበባ ቆንጆዎች መሃል "ምነው እሱን ባረገኝ" ብለው እስኪመኙ ድረስ በሙሉ ነፃነት ባጅን አሳይተህ በልዩ በር ደረትህን ነፍተህ መግባት መውጣቱ እራሱ ለንደኔ አይነቱ የመርካቶ ጉረኛ መልካም አጋጣሚ ነበር። የባዛር ስራ ቆንጆ መዝናኛ ነው። ስራህን እየሰራህ ሀገርህ ያበቀላቸውን ኮረዶች እየሾፍክ… በቴቪ መስኮት የምታውቃቸው አርቲስቶች … በአካል እየተፈራረቁ ሲያዝናኑ ማየት በራሱ የሚደላህ መዝናኛ አይደለም? ትላለህ! አረ ይደላል። ለምሳሌ ይሄ በመርካቶ የለም። በመርካቶ ምድር በስራህ መሀል የሚመጣው የሚያዝናና አቀንቃኝ ሳይሆን በሚያሳዝን ድምፅ እያቀነቀነ ምፅዋት የሚጠይቅ የኔ ቢጤ ነው። በባዛር ውሎ ስራ ሳትሰራ ብትውም የአዲስ አበባ ቆንጆዎች በጉብኝታቸው ሂደት አንተን ባያዩህም በሽያጭ ሱቅህ ተቀምጠህ በተጨናነቀው ቀጭን መተላለፊያ ሲተላለፉ ማየት በራሱ ደስ የሚል የትዕይንት ትርፍ ይፈጥርልሃል። በተለይ አንደኔ ላለው መርካቶ ውስጥ ሰውና አህያ ተጋፍተው ሲተራመሱ እያየ ላደገ ሰው። በባዛሩ ጊዜያዊ ሱቃችን እኛ እንሸጥ የነበረው እቃዎች ፈሳሽ ሳሙና፣ሬዲዮ፣ ጫማ፣ ቺብስ፣ የኘላስቲክ ለስላሳ መጠጦች ወዘተ እንደ ሱፐር ማርኬት የተቀላቀለ አይነት ዕቃ ነበር። (በነገራችን ላይ በተለምዶ የምናውቀው የኢግዝቢሽን ገበያ ከመደበኛው ገበያ የዋጋ ቅናሽ እንደሚኖረው ነው አይደል? ነገር ግን እኔ በአስር ቀን የኢግዝቢሽን ልምዴ የተረዳውት የዚህን ተቃራኒ ነው። የመርካቶ እቃ በኢግዝቢሽን ማዕከል እንደውም በጭማሪ ለትርፍ ይሸጣል። ሰው ቅናሽ ነው የሚለው እሳቤ ይዞ መጥቶ ኡሞ ገብቶለት ይሄዳል። መርካቶ አልሸጥ ያሉና ኤክፓየር ዴታቸው የደረሰ እሽግ ምግቦ በባዛር በደንብ ይሸጣሉ። የዋጋ ጭማሪ የሚታየው እንደኛ ላሉ በግል የተሳተፉ ሻጮች እንጂ ድርጅቶችን እንዳልሆነ ልታሰምርልኝ ይገባል።)   በአንዱ ቀን አሰሪዬ ቶፊቅ ለኔና አንድ አብሮኝ ለሚሰራው ልጅ። አልሸጥ ያለለንን ቺብስ ለማስተዋወቅ አልፎ አልፎ አንድ አንድ በነፃ አድሉ! በተለይ የማንም አይን ለሚስቡ ለቆንጆ ሴቶች! እነሱ ለመታየት ቅርብ ስለሆኑ በዛውም ቺብሱን ያስተዋውቁልናል አለን። በጣም ደነቀኝ!! " እነ ዲኬቲ ኢትዮጲያ በየጎዳናው በሚቆሙ ቢልቦርድ ምርታቸውን ለሚያስተዋውቁላቸው ሞዴሎች በሚልዮን የሚቆጠር ብር በሚከፍሉበት ምድር፣ አሰሪዬ ቶፊቅ ቆንጆዎችን ያለክፍያ በዘዴ እንደ ተንቀሳቃሽ ቢል ቦርድ የመጠቀም ሃሳቡን አድንቄለት!!) ወዳዘዘኝ ተግባር ወዲያው ተሰማራው። ሽያጩን ለስራ ባልደረባዬ ዳይቨርት አድርጌ ትቼ በፊቴ ከሚያልፈው የቆንጆ ጅረት የሳበችን በአይኔ እየተጠራው ተጋበዙልኝ እያልኩ እንደደጋሽ ቺብሱ ሳድል ዋልኩ (በወቅቱ እድሜዬ የጉረርምስና መጀመሪዬ ስለነበር ያየኋት ሴት ሁሉ ትስበኛለች፣ታምረኛለች፣ ታሻፍ… ለች። እንኳን የሄዋን ዘር ፍየል እራሱ ቀሚስ ለብሳ ብታልፈኝ ችብሱን መጋበዜ አይቀርም ነበር። የሆነው ሆኖ ቺብሱን እንደ በራሪ ወረቀት ሳድል ዋልኩ። አመሻሽ ላይ አሰሪዬ ቶፊቅ መጥቶ ሂሳብ ስንሰራ ቺብሱ የሁለት ካርቶን ጉድለት አሳየ።

"እንዴ ምንድነው?" አለ።

"ለቆንጆ ሴቶች አድል ያልከኝ ነው ጉድለቱ?" አልኩት ፈርጠም ብዬ።

"አልፎ አልፎ ማለት ታዲያ ሁለት ካርቶን ሙሉ እስኪያልቅ ነው እንዴ?"

"እሱማ አልፎ አልፎ ነበር ያልከኝ… "

"እና! … "

"እናማ … እየተንተባተብኩ… ነገር ግን እዚህ የሚያልፉት ሁሉ ቆነጁብኝ ምን ላድርግ? ሁሉም ቢቆነጁብኝ ጊዜ ቢለዩ ቢለዩ ብዬ …ለሁሉም  አደልኳቸው… ዛሬ ደግሞ እንዳለ ቆንጆ ብቻ፣ነበር…  አደለ እንዴ ብዬ ወደ ስራ ባለደረባዬ ዞርኩ…

"አዎ በሚል ጭንቅላቱን ነቀነቀ።"

"ዝጋ! ቆይ ችግር የለም! በደሞዝህ እንነጋገራለን። ብሎ እሳት ለብሶ እሳት ጎርሶ ሄደ። ምስኪን ቶፊቅ አሁን የተናገረውን ቡሃላ ይረሳዋል። በሆዱ ማቄም የሚባል ነገር አያስተናግድም። በደሞዜ ይዛት እንጂ አልቆረጠብኝም ነበር…የአዲስ አበባው ባዛር አልቆ ቀጣይ በተዘጋጀው የአዋሳ ባዛር ተሳትፈን … ወደ አዋሳው ባዛር የስራ አቡጊዳዬን ለመቀጠል አቀናው… በአዋሳ በጣም ደስ የሚል አስቂኝ፣ ገጠመኝ… በማስተናገድ ለ15 ቀን አሳለፍን…
ወገሬት!! 

"የ ቄ ሳ ር … እ ን ባ"

  ወይኔ መንጌ መጨረሻዬ ይህ ሆነ? ለደቂቃዎች በዝምታ ተዋጡ። እንጥላቸው ዱብ… ሀሞታቸው ፍስስ… ቅልጥማቸው ድቅቅ… ወገባቸው ዛለ… ጉልበት ከድቷቸው ተንገዳገዱ። ራቅ ብሎ አንድ ድንጋይ ታያቸው። ሄደው ቁጭ አሉበት። እንባቸውን መቆጣጠር አልቻሉም… ፈሰሰ። በጉንጫቸው ተንሸራትቶ ሱሪያቸው ላይ ተንጠባጠበ። አብረዋቸው የነበሩ ባለስልጣናት በብዙ ልመና ከተቀመጡበት አስነሷቸው። እንዳቀረቀሩ ወደ ሄሌኮኘተራቸው ገቡ። … ሄሊኮፕተሯ እንደተነሳች ተቀምጠውባት የነበረው ድንጋይ በዙ 50 ካሊበር አውቶማቲክ መሳሪያ ፍርክስክሷ ወጣ። "ነው እንዴ…? አሉ መንግስቱ ሀይለማሪያም!! "ይሄ ፈፅሞ የጠላት ጥይት አይደለም። የጄኔራል ገዝሙ ስራ ናት!!" ተስፋ መቁረጥ በደማቸው ተሰነቀረ። ከዚህ ቡሃላ የግል ህይወታቸውን ማትረፍ መሆኑ ቁልጭ ብሎ ታያቸው። ወደ አዲስ አበባ ተመለሱ። በሚቀጥለው ቀን ጧት ወደ ዚምባብዌ የሚበር ቻርተር አውሮፕላን አዘዙ። ••••••••••••••••••••••••••••••••••••••••••••••••••• አርብ ሚያዚያ 11/1983 ኮ/ል መንግስቱ ሀይለማሪያም፣ ብሄራዊ ሸንጎ የተባለውን አካል አስቸኳይ ስብሰባ ጠሩ። በዚህ ስብሰባ ማጠቃለያ ላይ የሀረሩ ሀገረ ስብከት ጳጳስ ንግግር ቆሽቴያቸውን አሳረረው… "…ክቡር ኘሬዝዳንት፣ በዚህ አዳራሽ ዳግም የምንገናኝ አይመስለኝም፣ … እርስዎም 50 ሚልዮኑን የኢትዮጲያን ህዝብ በደም ባህር ማግደው፣ ቆስቁሰው… ለእሳት ዳርገው።… የቴዎድሮስን ፅዋ ከመጠጣት በቀር ሌላ የለዎትም። ይሄን እንዳማያበላሹትም አምናለው…! ይሸሻሉ የሚል እምነት የለኝም። እግዚአብሄር ምስክሬ ነው! መንጌ! እዚያችው እተቀመጡባት ወንበርዎ ላይ ቋንጣ ሆነው እንደሚቀሩ አምናለው። እግዚአብሄር ምስክሬ ነው! ይህን ባያደርጉ ግን ታሪክ ይፋረድዎታል። ኮሎኔል መንግስቱ ለጳጳሱ በሆዳቸው መልስ ሰጡ። "ወይኔ መንጌ፣ እንዲህ ልደፈር? የማን አባቱ ቀልቃላ ደብተራ ነው? እስኪ ያማከርኩት አይመስልም? ቴዎድሮስ ራሱን ያጠፋው በዘመኑ አይሮኘላን ስላልነበረ መሆኑን መረዳት እንዴት ያቅትሃል? ወዳጄ ለዚህ ልግምተኛ ህዝብ ብዬ ትርጉም አልባ ሞት እንድሞት ያምርሃል? በፍፁም አልሞትም!!" …ኮ/ል መንግስቱ ከስብሰባው ቡሃላ ወደ ቤተመንግስት ቤታቸው አመሩ። ባለቤታቸው ወይዘሮ ውባንቺና ልጆቻቸው ቅዝዝ ብለው ተቀምጠው ደረሱ። … በተቀመጡበት የሳቸውን መምጣት ሲያዩ ነቃ ነቃ አሉ። አምባሳደር አስራት ሀይሌም ነበሩ። መንግስቱ የተለመደውን ሰላምታ ሰጥተው ወደ መልበሻ ክፈላቸው አመሩ። ልብሳቸውን ቀይረው ከተመለሱ ቡሃላ ሶፋው ላይ በትካዜ ተቀመጡ። አሁን የድሮው ወሬ አልነበረም። የቤቱ ድባብ ያስፈራል። አምባሳደሩ አንዳች ነገር መናገር የፈለጉ ይመስላሉ። መንግስቱ ለመስማት ፍቃደኛ አልነበሩም። ለውጦቹን አንድ በአንድ እያነሱ መጣል ጀመሩ። በበታቾቻቸው መደፈራቸው፣ የሚያምኑት የሚታዘዛቸው ሰው መጥፋት… " ወይኔ መንጌ መጨረሻዬ ይህ ሆነ! ግንፍል ብሎ የመጣ እንባ ተናነቃቸው። …ከሁሉ ከሁሉ የነደዳቸው የአዲስ አበባ ዩኒቨርሲቲ ተማሪዎች በመፈንቅለ መንግስት ተይዘው የነበሩ ጄነራሎች መረሸን መቃወምና፣ የሳቸውንም ፎቶ ማቃጠላቸውን ሲሰሙ ነበር። መረጃውን ያደረሱላቸውን ኮ/ል ተስፋዬ ወልደስላሴ ነበሩ። "ይሄ መንጋ ተሽካላ… የድሃ ልጅ!! ብስጭት አሉ። "እሱ ተምሮ ሀገር ሊቀይር? ምን ያድርግ ያጠገብኩት እኔ!! እናቱ አሳይታው የማታውቀውን ምግብ ሲውጥ እንዴት አይጥገብ?" መንጋ ያላዩ ልጅ ሁላ!!" መንግስቱ በስሜት ተውጠው ስልክ አነሱ። ለኢሰፓ አንደኛ ተጠሪ ሻለቃ እንዳለ ተሰማ ደወሉ። "ጓድ!! ረብሻ ያነሱ ቀንደኛ ተማሪዎችን አጣርታችሁ በሁለት ቀናት ውስጥ እርምጃ ትወስዳላችሁ።"ስልኩን ዘጉት። በሶስተኛው ቀን እነዚሁ ባለስልጣናት ተመልሰው መንግስቱ ቢሮ መጡ። ቀንደኛ የተባሉትን 25 ተማሪዎች፣ ስም ዝርዝራቸውን አቀረቡ። መንግስቱ የተማሪዎቹን ስም የያዘውን ወረቀት በአይናቸው ከመረመሩ ቡሃላ "የማጣራት ሂደቱን ከጨረሳችሁ ጓድ ተስፋዬ ትቀጥላህ!! ባለፈው እንደተነጋርነው እርምጃ ትወስድባቸዋለህ። "የእጃቸውን ትሰጣቸዋለህ!! ማለት ነው። ባለስልጣናቱን አሰናበቱ። ቀጥለው ቢሮቸው የገበቱ ኮ/ል ፍሰሃ ደስታና ኮ/ል ተካ ቱሉ ነበሩ። መንግስቱ ካቀረቀሩበት ቀና ብለው አዮዋቸው። …የውድቀት ዜና አምጥተው ይሆን? ምንም ይሁን ግድ አልነበሯቸውም። ምን ያልወደቀ ነገር አለና? አድሜ ለዚህ መንጋ በርሜል…ሁሉ "ኮ/ል ፍሰሃ የመጡበትን መናገር ቀጠሉ…"ጓድ መንግስቱ፣ አንድ ነገር ልንለምንህ ነው አመጣጣችን ትላንት ጄኔራሎቹን ገደልን፣ በዚህ በተከበብንበት ወቅት፣ ለጋ ተማሪዎችን ብንገድል ህዝብ ምን ይለናል?…ባይሆን እንደ አባት መክረን ዘክረ… መንግስቱ አላስጨረሱትም ድንገት ቱግ አሉ…" አጣርታችሁ እርምጃ ውስዱ አልኩ እንጂ… መች ይገደሉ አልኩ? ቆይ ምንድነው ነገሩ? ብብቴ ስር እየተሴረብኝ ያለው ሴራ? ጠረጴዛውን በቡጢ ነረቱት… "ጓድ እንደሱ ከሆነ ችግር የለም። ለደህንነትዎ አስበን ነው። ብለው ኩምሽሽ እንዳሉ ተያይዘው ከቢሮ ወጡ።" ጊዜው በሮ የግንቦት ወር ገባ። … ከሎኔል መንግስቱ ከዚህ ቡሃላ አንድ ታላቅ ዘመቻ ወጠኑ። በሳቸው የሚመራ ሰራዊት አከማቹ። ማዘዣ ጣቢያው ከሪሙ ላይ አቆሙ። በመሃል ለአስቸኳይ ስራ፣ አሰብ ደርሰው ከቀናት ቡሃላ ሲመለሱ ከሪሙ ያዘጋጁት ጦር በቦታው አልነበረም። ተበሳጭተው ወደ አዲስ አበባ አቀኑ። ሌላ አስደንጋጭ ዜና ጠበቃቸው። የወሎው ማዘዣ ጣቢያ ነቅሎ ደብረብርሃን ሰፍሯል። ቢሆንም በፊት እሳቸው ሳያውቁት አይሞከርም ነበር። የኢአዴግ ሰራዊት የአንቦን ከተማ ለሁለተኛ ጊዜ ተቆጣጥሮ… ወደ አዲስ አበባ ለመግባት ጉዞ ጀምረዋል። መንግስቱ ይህን ጉዞ ለመግታት አንድ ታላቅ ጦርነት ለማንሳት ተነሱ። ሁኔታዉን ለመረዳ በሄሊኮፕተር አንድ ኮረብታ ላይ አረፉ። ወርደው ቁልቁል ተመለከቱ። ሠራዊታቸው ወደ አዲስ አበባ ይተማል። አስራ ሰባት አመት ሙሉ ያቆሙት እልፍኝ ሲፈርስ… ፍርስርስ ማለቱን ውስጣቸው ቁልጭ አድርጎ ነገራቸው። ወይኔ መንጌ መጨረሻዬ ይህ ሆነ? ለደቂቃዎች በዝምታ ተዋጡ። እንጥላቸው ዱብ… ሀሞታቸው ፍስስ… ቅልጥማቸው ድቅቅ… ወገባቸው ዛለ… ጉልበት ከድቷቸው ተንገዳገዱ። ራቅ ብሎ አንድ ድንጋይ ታያቸው። ሄደው ቁጭ አሉበት። እንባቸውን መቆጣጠር አልቻሉም… ፈሰሰ። በጉንጫቸው ተንሸራትቶ ሱሪያቸው ላይ ተንጠባጠበ። አብረዋቸው የነበሩ ባለስልጣናት በብዙ ልመና ከተቀመጡበት አስነሷቸው። እንዳቀረቀሩ ወደ ሄሌኮኘተራቸው ገቡ። … ሄሊኮፕተሯ እንደተነሳች ተቀምጠውባት የነበረው ድንጋይ በዙ 50 ካሊበር መሳሪያ… ድው!?… ፍርክስክሷ ወጣ። "ነው እንዴ…? አሉ መንግስቱ ሀይለማሪያም!! ሽቅብ ይዛቸው በምትወጣው ሄሊኮፕተር መስታወት ቁልቁል እያዩ … "ይሄ ፈፅሞ የጠላት ጥይት አይደለም። የጄኔራል ገዝሙ ስራ ናት!!" አሉ። ተስፋ መቁረጥ በደማቸው ተሰነቀረ። ከዚህ ቡሃላ ጥያቄው የግል ህይወታቸውን ማትረፍ መሆኑ ቁልጭ ብሎ ታያቸው። ወደ አዲስ አበባ ተመለሱ። በሚቀጥለው ቀን ጧት ወደ ዚምባብዌ የሚበር ቻርተር አውሮፕላን አዘዙ። ወ/ ሮ ውባንቺና ልጆቻቸው ጓዝ ጥቅለላ ይጣደፋሉ። አምባሳደር አስራት የመንግስቱን ዋና ዋና ንብረቶች ያዘጋጃሉ። መንግስቱ ጥድፊያቸውን ያላዩ መስለው አለፏቸው። ጥቁር ገፃቸው ከሰል መስሏል። የቤተመንግስት ምግብ አብሳይ ሴቶች እየሰሟቸው ምፅ! ብለው ከንፈር ይመጣሉ። ከሁሉም የመረራቸው ይኸው የሰዉ የሀዘኔታ አተያይ ነበር። ከቁርስ ቡሃላ አራት ጠባቂዎቻቸውንና ሻለቃ ደመቀ ባንጃውን አስከትለው በሁለት ሽፍን መኪናዎች ተሳፍረው በ10ኛው በር በኩል ወጡ፣ ወደ ቦሌ። በመኪናው ጥቁር መስታወት አሻግረው ወደ ውጪ ተመለከቱ። አዲስ አበባ በቁሟ አንቀላፍታለች። ከግንባር ሸሽቶ የመጣው ሰራዊት ጠመንጃዉን ያለ ወጉ ይዞ ከልተም ከልተም ይላል። ሰዎች እየከበቡ በጥያቄ አሳራቸውን ያበለሏቸዋል። "መንጋ አዛባ … ቂጡን ቆልፎ አይዋጋ ይሸሻል። ይኸው ለዚህ ውርደት አበቃኝ። እስቲ ኢትዮጲያ የኔ ሀገር ብቻ እንደሆነች ይረከባት። ይሄ ወረኛ ህዝብ እንደ አለት ተጋግሮ ዝም ያለው እኔ ብቻ የምጎዳ መስሎት ከሆነ ይቅመሰው። … አስጎንብሶ በጉማሬ ሲዠልጠው ያኔ መንጌ መንጌ ይላል!!ኢትዮጲያን ፈርሞ አስረክቦኛል እንዴ?"! መኪናዎቹ ተከታትለው ወደ ቦሌ አየር ማረፊያ ገቡ… ምንጭ ፣= (የቄሳር እንባ (ሀብታሙ አለባቸው) ነው።) ወገሬት!!

ሰላማዊቷ ሌሊት

" ሰ ላ ማ  ዊ   …   ሌ ሊ ት"
#ሳteናw

… በዛ ውድቅት የረመዳን ሌሊት ከየት መጣ ያላልነው ፍሬን የበጠሰ መኪና፣ እየተንደረደረ… ቀኛችንን ይዘን በቆምንባት በጠባቧና ቁልቁለታማው መንገድ ከላበላያችን መጣብን። መኪናው ወደኛ መኪና ባለው ፍጥነት ሁሉ ይጋልባል… ካለንባት መኪና ወጥተን እንዳናመልጥ መኪናው ደርሶብናል… ሁላችንም ካሁን አሁን ያለንባትን D4D መኪና  ከፊትለፊታችን ወደሚገኘው ገደላማ… ውስጥ ጠራርጎ ይዞን ገባ በሚል ድንጋጤ ከቁጥጥራችን ውጪ የሆነ ጩኸት ለቀቅን… ስናልቅ ላለማየት አይኖቻችንን ጨፈንን… ጓ … ጓ…ገጭ… ግግው…ጓ…
•••••••••••••••••••••••••••••••••••••••••••

①እኛ፣ቁርዓንን፣በመወሰኛይቱ፣ሌሊት፣አወረድነው።
②መወሰኛይቱም፣ሌሊት፣ምን፣እንደኾነች፣ምን፣አሳወቀህ?።
③መወሰኛዪቱ፣ሌሊት፣ከሺሕ፣ወር፣በላጭ፣ናት።
④በርሷ፣ውስጥ፣መላዕከቱና፣መንፈሱ፣በጌታቸው፣ፈቃድ፣በነገሩ፣ሁሉ፣ይወርዳሉ።⑤እርሷ፣እስከ፣ጎህ፣ድረስ፣ሰላም፣ብቻ፣ናት።(አል ቀድር)

  ይህቺ በቁርዓን ሰላም የተሰኘችዋ ሌሊት በረመዳን የመጨረሻዎቹ አስር ቀናት ውስጥ እንደሆነች በተለይም በጎዶሎ ቁጥር ቀናት በ21/ 23/ 25/ 27 /29 /ውስጥ ልትሆን እንደምትችል በተለይም 27ኛዋ ሌሊት ጥርጣሬው እንደሚልቅ በተጨማሪም ይህች ሰላም የተባለችው ለሌት ብዙ ምልክቶች እንደሚታይባትም ነቢያዊ አስተምህሮት ይገልፃል።
ከነርሱም ውስጥ… ለሊቱ ሞቃታማም ብርዳማም ሳይሆን ሠላም የሆነ ለሊት ከሆነ ምናልባት ዝናብ ሊጥል ይችላል ከዚህም በተጨማሪ በንጋቱ ፀሐይ እንደወጣች ያላት ብርሃን (የጨረር) መጠን ትንሽ ለማይባሉ ደቂቃዎች አይንን ሳይጎዳ ወደ ፀሀይ መመልከት መቻሉ ነው።)

••••••••••••••••••••••••••••••••••••••••••

  ረመዳን 27 ለይልን ሳስታውስ ሁሌም አምና ረመዳን ያሳለፍኳት ይህቺ ሌሊት ፊቴ ላይ ድቅን ትላለች…

   ጓደኛዬና ሚስቱ (ዘመዴ ነች)፣ በያመቱ ረመዳን ያስለመዱትን ገጠር ሄደው ሰደቃ ለማውጣት እኔና የሚስቱን ወንድም ጨምረው እንደምንሄድ ተነጋግረን። ረመዳን 27 ለይል ከኢሻ መልስ በጓደኛዬ ቤት ተገናኘን። አንድ ቀን በጓዴ ቤት፣አንዱ ቀን በሚስቱ ቤት ሰደቃውን ለማድረግ ታቅዶ ጉዟችን በ27ኛዋ ሌሊት ኢንዲሆን ተወሰነ። ከእራት ቡሃላ ትንሽ ተቀማመጥን፣ መተኛት ቢያሰኘንም መተኛቱን ትተን ተቀመጥን መጨዋወት ያዝን። ምሽት ላይ ትንሽ ዝናብ ጣለ ቢሆንም የአየሩ ሁኔታ የማይሞቅም የማይበርድም ነበር። ከወትሮው በተለየ ሁኔታ በመካከላችን እርጋታ ሰፍኖኗል። የጓዴ ባለቤት ቡና ከጠጣች ቡሃላ ጉዞ ስንጀምር እንድንቀሰቅሳት ነግራን ሄዳ ደቀሰች። ሌላጊዜ በረባ ባልረባው የምንነታረክ ልጆች በዚህች ቀን አስሬ ዱዓ ስናደርግ፣ የምናውቀውን ቂሳ ስንናገር አረፈድን።  የመሄጃችን ሰዓቱ ሲደርስ… ቀስቅሰናትና… ሱሁር በልተን… የፈጅርን ሰላት መንገድ ላይ ለመስገድ ወስነን …  ጉዞ ጀመርን።

   የሌሊቱ አየር ደስ ይላል ጥርት ባለው ሰማይ ላይ ከዋክብት ብልጭ ድርግም እያሉ ይጠቅሱናል… ከዚህም ከዚያም ይሰሙ የነበሩ የውሾች የማላዘን ድምፅ ደብዛው ጠፍቶ በምናልፍበት መንገድ ሁሉ የመስጂድ ድምፅ ማጉሊያዎች… የለይል ሰላትን ቁርአን ብቻ ያስተጋባሉ። ደስና አርግት ያለ ለሌት ነበር። ከከተማ ሳንወጣ ጓደኛዬ አንድ ገጠር ስትሄድ ትወስደኛለህ ያሉኝ አዛውንት ስላሉ እሳቸውን ፒክ እናድርጋቸው ብሎ፣ መኪናዋን ለሚዘውራት የባለቤቱ ወንድም ነግሮ … ሰውዬው ወደሚገኙበት ሰፈር ሄድን።ደረስን።

    ሰፈሩ ዳገታማና  ወጣ ገባ የሚበዛበት ከመሆኑ የተነሳ የአዲስ አበባ ምድር አይመስልም። በዚህ ወጣ ገባማው መልከአ ምድር ላይ የተገነቡት መኖሪያ ቤቶች አቀማመጣቸውን በርቀት ስታይ አንዱ በአንዱ ላይ ተደራርበው ሰርከስ የሚሰሩ ይመስላሉ። አብሮን ከሚጓዘው ሰውዬው ቤት ከግቢ በር ደረስን። ከአጥሩ ውጪ የቆምንበት ኮብልስቶን መንገድ ሲሆን  ከፊታችን የተዘቀዘቀ ቁልቁለት ከኋላችን ከተወሰነ ርቀት ቡኋላ የሚታጠፍና ደረቱን ገልብጦ የቆመ ዳገት ነበር። ጓዴ ወርዶ ከመንገዱ በስተግራ የሚገኘውን የግቢውን በር አንኴኳ። አፍታም ሳይቆይ የግቢው በር ከውስጥ ባለ ሰው ተከፈተ።  ግቢው ገደላማ ሲሆን፣ መኪናችን ቀኟን ይዛ ብትቆምም  ከመንገዷ ጥበት አንፃር መኪና ውስጥ ቁጭ ብለን ወደ ግቢው ስናይ እንደ ወለል ሆኖ የታየን የቤቶቹ ክዳን ቆርቆሮ ነበር። ከግቢው በር ወደ መኖሪያቤቶቹ የሚያደርሰው ረጅም ደረጃ መሆኑ ባናየውም ያስታውቃል።  የሰውየው ቤተሰቦች ጓዙን ከቤት ውስጥ እያመጡ መኪናችን ላይ መጫን ያዙ። እኛ መኪናዋ ውስጥ ቁጭ ብለን እስኪጨርሱ እንጠብቃለን። የጓዙ መብዛት ይሉኝታ ያሳደረባቸው የተጓዥ ታናሽ ወንድም… ወደ መኪናዋ መስኮት ተጠግተው በቃ አልቋል አንድ እቃ ነው የቀረው በማለት ወደ ጊቢው እንደዘለቁ።… በዛ ውድቅት ሌሊት ከየት መጣ ያላልነው ፍሬን የበጠሰ መኪና፣ ደረቱን ገልብጦ ከቆመው ዳገት… እየተንደረደረ ቀኟን ይዘን በቆምንባት በጠባቧና ቁልቁለታማዋ መንገድ መጣ። መኪናው ወደኛ መኪና ባለው ሁሉ ፍጥነት ይጋልባል… ካለንባት መኪና ወጥተን እንዳናመልጥ ደርሶብናል… ሁላችንም ካሁን አሁን ያለንባትን D4D መኪና ከፊትለፊታችን ወደሚገኘው ገደላማ በሆነው መኖሪያ ቤት ውስጥ ጠራርጎ ይዞን ገባ በሚል ድንጋጤ ከቁጥጥራችን ውጪ የሆነ ጩኸት ለቀቅን… ስናልቅ ላለማየት አይኖቻችንን ጨፈንን…  ጓ…ገጭ… ግግው…ጓ… ገጭ…  እያለና ድንጋይ እያነጠረው በመኪናችንና በግቢው መካከል ባለው ክፈተት የቆርቆሮውን አጥር እየታከከ… የመኪናችንን ጆሮ(ስፔኪዮ፣የጎን መስታወት) ጨርፎና አጥፎ በሚያስደንቅ ፍጥነትና ተዓምር ሽው ብሎ አለፈን። ከድንጋጤያችን ሳንወጣ ሰለጥቂት ስቶን  ቁልቁል የሚንደረደረውን መኪና ተመለከትን። መኪናው ሚኒ ባስ ሲሆን በሚጯጯሁ ተሳፋሪም ተሞቷል። የተጓዥ ቤተሰቦች ከግቢው ውስጥ የጓጓታውን ድምፅ ሰምተው ሮጠው ወጡ። ሚኒባሱ ሄዶ ሄዶ ቁልቁለቱ መሃል ወደ ሚታጠፍ ዳገታማ መንገድ እንደ ዘንዶ አየር ላይ ተምዘግዝጎ ገባ። የሹፌሩን ብቃት ማድነቅ ሳንጀምር ሚኒባሱ ከአይናችን ተሰወረ። ጭንቀታችን ለራሳችን መሆኑ ቀርቶ ሚኒባሱ ውስጥ ስላሉ ሰዎች ሆነ። ከመኪናው ውጪ የነበሩ የተጓዥ ቤተሰቦች የመኪናውን መጨረሻ ለማየት እየጮኹ ተከትለውት ሮጡ። እኛ በድንጋጤ ብዛት በድን ሆነን አንደበታችን ክዶናል። አይናችን ፈጧል።አፋችን ደርቋል። ከየጊቢው የጎረቤት ሰዎች መውጣት ጀመሩ። መኪናውን ተከትለው የሄዱ የተጓዥ ቤተሰብ ለጎረቤቶቻቸው ሁኔታዉን እያስረዱ ተመልሰው ወደኛ መጡ። የሁላችንም ጥያቄ አንድና እንድ ብቻ ነበር። የሚኒባሷና የተሳፋሪዎቹ መጨረሻ። ከአንድ ክምር አፈር ጋር ተጋጭቶ ከፊት ለፊቱ መስታወት ከመሰበር ውጪ ምንም የህይወት አደጋ ሳያደርስ መቆሙን ነገሩን። ከመንገዷ ጥበት አንፃር መኪናው ምንም ሳይነካን የመትረፋችን ነገር ሁሉንም የሰፈሩን ሰዎች አያስደመመ። እዚህ ጋር የአላህ ጥበቃ ባይኖረን ከነደዚህ አይነት ስፍራ መትረፋችን የማይታመን ነበር። አብረውን የሚጓዙ ሰውዬ መጡና እዬዬያቸውን አስነኩት። አስጨርሻችሁ ነበር ልጆቼ በሚል። እኛም ባለተረጋጋው መንፈሳችን እንዲረጋጉ ካደረግን ቡሃላ በድንጋጤ የፈጅርን ሰላት መንገድ ላይ እንሰግዳለን የተባባልነውን ትተን። እዛው ሰፈር ካለው መስጂድ ሰግደን ጉዞ ለመጀመር ወሰንን። ደጋግመን አላህን ስላተረፈን እያመሰገንን፣ ስለ ሁኔታው ደጋግመን እያወራን አዛን እስኪወጣ ጠበቅን። አዛን ብሎ የፈጅርን ሰላት መስጊድ በጀመዓ ሰገድን። መንገድ ስንጀምር ትዕይንቱ በአይነ ህሊናችን እንደ አዲስ እየተመላለሰብን በመካከላችን ፀጥታ ሰፈነ። መኪናችን አለምገናን፣ ዳለቲን እየተወች ትከንፋለች። ሰማዩ ከምስራቁ በኩል ይጠራ ጀመር… ብዙም ሳይቆይ ፀሀይ ድብዝዝ ያለና ለእይታ የማያግድ ጨረሯን እያፈነጠቀች መውጣት ጀመረች።  ይህን የፀሀይ ሁኔታ ስመለከት በጣም ገረመኝ። ያስገረመኝ …  ከላይ በቁርዓንና ሀዲስ ከሺህ ወር በላጭ ናት ተብላ  ስለጠቀሠችው ሌሊት ሊታይባት ይችላል የተባለውን ምልክቶች፣ ባሳለፍነውን ሌሊት እነዚህን ምልክቶቹን ሁሉ ማየቴ ነበር፣ … ዝናብ መጣልና የማይበርድም የማይሞቅም  አየር ፀባይ፣ የተረጋጋ ድባብ፣ አሁን ደግሞ ለእይታ የማያግደው የፀሀይ ሁኔታ፣ ድጋሚ ለጥቂት የተረፍንበት የመኪና አደጋ። የምንሄድበትን ጉዳይ ጨርሰን እስክንመጣ ስለዚህች ሌሊት ደጋግመን መገረማችን ደጋገመን ማንሳታችን አልቀረም። እውነትም ሰላማዊቷ ሌሊት ብያታለው። ከዛን ቀን አደጋ የታደገን አላህ አሁንም ምስጋና ይደረሰው አሁንም ጥበቃው አይለየን።

ለማንኛውም ይህቺ ሌሊት አሁን ያለንባት የረመዳን የመጨረሻ አስር ቀናቶች ክልል ውስጥ ትገኛለች። ከትሩፋቶቿ ለመጎናፀፍ ከመቼውም በበለጠ በኢባዳችን ልንጠነክር ይገባል አላህ ለይለተል ቀደር ይወፍቀን!!! ዱአውም ለጨቋኝ ሀይሎች በግፍ ለታሰሩ ኡስታዞቻችን የሚደርስ ያድርገው!!
ወገሬት!!

እኔን ነው?! እንዲል እከ!!

"እኔን … ነው? እንዲል…  እከ!!
#ሳteናw

… ይህ እድል ያልገጠማቸውም ሚስኪን እህቶቼ፣ ካሁን አሁን ፖሊሶች መጡብን በሚልና ባለመረጋጋት ስሜት ግራ ቀኛቸውን ይገላምጣሉ። ይህን መሰሉ የፖሊስ ፍራቻ በእነዚህ እህቶቼ ብቻ ሳይሆን በጎዳና ንግድ ላይ በተሰማሩ ወጣቶችም ላይ ይስተዋላል። እንደ እውነቱ ከሆነ ፖሊስን አይቶ መሸበር የሚገባው ሌባ ብቻ በሆነ ነበር…
•••••••••••••••••••••••••••••••••••••••••••••

  አዉቶቢስ ተራ አካባቢ ታክሲ ውስጥ ተቀምጬ ታክሲው እስኪሞላ በመጠባበቅ ላይ ነኝ። … ሰአት ስለረፈደብኝ ቸኩያለው፣መረጋጋት አጥቻለው። ለነገሩ መረጋጋት የተባለው ነገር በኔ ብቻ ሳይሆን በብዙሃኑ ማህበረሰብ ውስጥ ከታየ  ሳይቆይ የቀረ አይመስለኝም። (ከምር ግን መረጋጋት የተባለው ነገር አልናፈቃችሁም? ይሄ ይሄ ብዬ ባልዘረዝረውም ሁሉም እኮ ጥድፊያ ላይ ነው፣ ለሀቂቃ!! አለ አይደል የትም የማያደርስ ጥድፌያ!!። አልሞላ ባለኝ ታክሲ በመስኮቱ አሻግሬ ምንም የተረጋጋ ህይወት የማይታይበትና የሚዋከበውን አላፊ አግዳሚ ተመለከትሁ… አይኔን ቀና አድርጌ አዲሱ የከተማ ባቡር ድልድይ ላይ የተለጠፈው ፖስተር እንደነገሩ ካየሁት ቡሃላ ነቅዬ ቁልቁል ፈጠፈጥኩት…  የአዲስ ከተማ ሁለተኛ ደረጃ ትምህርት ቤት፣ የቴሌውና፣ የትንሹ አውቶቢስ መናኸሪያ፣ አጥሮች እንደ ሙዓመር ጋዳፊ በወጣት ሴቶች ታጅበዋል …ለዛውም ቁጥር ስፍር በሌላቸው ሴቶች። ከፊት ለፊታቸው ያለው የባቡሩ ድልድይ ስርም በመደዳ ዘርዘር ብለው በቆሙም ሴቶች ተሞልቷል። ታዲያ እነዚህ እህቶቼ ተሰልፈው የቆሙት ለታክሲ እንዳይመስልህ… ምፅ!! በምን እድላቸው!! በስራና በአማራጭ እጦት በወሲብ ንግድ ላይ ተሰማርተው መሽኚያቸውን እንደ ሱቅ መተዳደሪያቸው ያደረጉና… ይዟቸው የሚሄድ ወንድ የሚጠብቁ ምስኪን እህቶቼ እንጂ። በፊት በሰባተኛና በሌሎች ጉራንጉር ሰፈሮች ብቻ የነበረው የወሲብ ንግድ ዛሬ ላይ እንደ ካሮት ቁልቁል አድጎ በየጎዳናው ላይ ከሆነ ውሎ አደረ። ከነዚህ እህቶቻችን ውስጥ አብዛኞቹ ታዳጊ ወጣቶች ሲሆኑ የወጣትነት ዘመናቸው ላይ ሃያ አመት የጨመሩም  አሉ። በርካቶቹ ፀጉራቸውን በሂጃብ ጠምጥመው ከስር ገላቸውን እንደ መርፌ በሚጠቀጥቅው ቅዝቃዜ ብጣሽ ጨርቅ ብቻ ጣል ያደረጉ ናቸው። ከላይ የጁምዓ ከስር የቅዳሜ አለባበስ!በለው። ለምን ይሆን ሻሽ (ሂጃብ) የሚጠመጠሙት? ለጊዜው ግምቱ እንጂ እውነቱ ስላልተገለፀልኝ … እንደኔው ገምት። ወጣትነታቸውን በማገባደድ ላይ ያሉት በገፅታቸው ላይ ገበያ ለመሳብ በሚል የተጫረ አርቴፊሻል ፈገግታ ሲያሳዩ…  ታዳጊዎቹ ደግሞ ለገበያቸው ብዙም ጉጉት ሳያሳዩ ቆመው፣
እርስ በእርስ ሲስቁ ሲቀላለዱ፣ ሲላፉ፣ ይታያል… ይህን ሁኔታቸውን ስታይ አንድም ልጅነታቸው አንድም ገና በዚህች ትንሿ  እድሜያቸው እያለፉበት ያለውን መራራ ህይወት ለመርሳት በሚል እንደ ሆነ እንጂ … ደልቷቸው አልያም በስራቸው ደስተኛ ሆነው አንዳልሆነ ስድስተኛው ስሜትህ ይነግርሃል። ሌሎቹ (ቅንዝር አዳማዊያን ማለቴነው) ደግሞ እንደ በግ ገዢ አካላቸውን ከዳበሳ ባልተናነሰ እይታ… ከሚያዩና ዋጋ እንደሚነጋሩ ሁኔታቸው ከሚያስታውቅ ወንዶች ጋር ቆመው ያወራሉ። የተስማሙትም ገንጠል ብለው ተያይዘው ይሄዳሉ።… ይህ በለስ ያልገጠማቸውም፣ ካሁን አሁን ፖሊሶች መጡብን በሚል ግራ ቀኛቸውን ባልመረጋጋት ስሜት ይገላምጣሉ። ይህ የፖሊስ ፍራቻ በእነዚህ እህቶቼ ብቻ ሳይሆን በተለያዩ ስፍራዎች ላይ የጎዳና ንግድ ላይ የተሰማሩ ወጣቶችም ላይ አለ። እንደ እውነቱ ከሆነ ፖሊስን አይቶ መሸበር የሚገባው ሌባ ብቻ በሆነ ነበር
ይህን ትዕይንት ስመለከት ለአፍታ የራሴን ችግር ትቼ በነዚህ እህቶች ዙሪያ ራሴን ስብሰባ ጠራው…

  መቼም እያንዳንዳቸው ህይወት ጀርባ ለዛሬው አስከፊ ህይወት የዳረጋቸው የተለያየ የህይወት ገጠመኝ ቢሆንም። ዞሮ ዞሮ አንድ የሚያደርጋቸው ነጥብ አለ። ችግር !!። በዚህ ቅዝቃዜው ጣት በሚቆረጥም ብርድ፣ እስቶኪንግ ብቻ አስለብሶ፣ የውሸት ፈገግታ አላብሶ፣  ለገበያ ያወጣቸው ነገር ቢኖር ፣ ችግር መሆኑ ለማንም ግልፅ ነው። ታዲያ ሌላ ስራ አይሰሩም ወይ? ብዬ በውስጤ እንዳልወቅሳቸው፣ ዛሬ ላይ ያደረሳቸውን መንገድ በግልፅ ሳላውቅ መውቀሱ ሞራል አሳጣኝ። ግን አንድ እውነት አለ!! የትኛዋም እህት ወደዚህ ስራ በፍላጎቷ የገባች እንደማትኖር በእርግጠኝነት መናገር ይቻላል። በዛው መጠን ይሄን አስነዋሪ ስራ አንሰራም ወይም አንሰርቅም ብለው በጎዳና ላይ ንግድ የተሰማሩ ወገኖቸም በአማራጭ እጦት ነው እንጂ በፍላጎቱ ሌባና ፖሊስ መጫዋት ስላማረው ነው የሚል እምነት እንደሌለኝና ይህንንም ሀሳብ እንደምታጋሩኝ አምናለው።  አስነዋሪም ሆነ ህገ ወጥ ስራዎች የሚቀረፉት፣ ብዙ የስራ አማራጮች ሲፈጠሩ ነው። ይህ ሊፈጠር የሚችለው በአስተዳደር በኩል ነገራቶች ሲመቻቹ መሆኑ ለማንም ያልተሰወረ የአደባባይ ሚስጥር ነው። የስራ አማራጭ ላጣ ህዝብ የሚጠቅመው አማራጮችን ማቅረብ እንጂ አሯሯጮችን አሰማርቶ የአማራጭ መጨረሻቸውን መንፈግና ማስነጠቅ እንዳልሆነ ቅን ልቦና ያለው የሚያውቀው ሀቅ ነው። የሚበላው እስኪያጣ የተቸገረ ህዝብ የፈለገውን ሰርቶ ቢያድር አይፈረድበትም። መቼም ይሄን ሳያውቅ የሚቀር ነጂም ተነጂም እንደማይኖር አውቃለው። እንዲያው ነገሩ ቢጨንቀኝ ቢጠበኝ፣ ነው!! ለአመልህ ድከም ሲለኝ!!

…ግን ደግሞ ይህን ከልቤ ተመኘው!! አለ አይደል ጀሊሉ ብሎልኝ! የዳንጎቴን ወይም የሸሁን ሩብ ሀብት ቢኖረኝ ማለት ነው… [ከልቤ ነው! መርቅኜ ምናምን እንዳይመስልህ!]

  እነዚህንና በመሰል ስራ ላይ የተሰማሩ እህቶቼን ቅድሚያ የስራ እድል የሚሰጥ … ልክ እንደ … ምንድነው እሱ ሚሉት ጨርቃ ጨርቅ ፋብሪካ!… ምነው ይሄ ዳለቲ ያለው … ስሙ እኮ… ምላሴ ላይ… አለ! … እንደውም… በያመቱ ለዘንዶ ይገብራል እየተባለ የሚታማው… አዎ!! አይካ አዲስ። እንደሱ አይነት!! በተለያዩ ስፍራዎች በተለያዩ አይነት ዘርፎች የተሰማሩ በርካታ ድርጅት አቋቁሜ፣ የስራ አማራጮች በገፍ እንዲሆኑ  አድርጌ  … ህይወታቸው ከአስነዋሪው ስራ አውጥተው በተመቻቸው የስራ አማራጫቾች በመረጡትና በፈለጉት ስራ ተሰማርተው፣ አንደ ሰው፣ ሰርተው ተቀይረው ሀገር የሚቀይሩ ሀይል  ባደረኳቸው። ብዬ ተመኘው። መቸም ምኞት አይከለከል። የሚሞላው እሱ ነውና።

… የተሳፈርኩበት ታክሲው ሞላና መንቀሳቀስ ሲጀምር… ከሀሳቤም ከምኞቴም ተመለስኩ። አዲሱ የከተማ ባቡር ድልድይ ላይ ተለጥፎ ያየሁትን ፖስተር ድጋሚ ተመለስኩት… ፅሁፉን አነበብኩ። ያነበብኩትን ተጠራጥሬ… የአይኔን ሽፋሽፍቶች በጣቶቼ አሸት አሸት አድርጌ ብሌኔን ወለወልኩና… ድጋሚ ፅሁፉን አነበብኩት…እንዲህ  ይላል።
"…የህዝቦቿን ተጠቃሚነትና አንድነት ያረጋገገጠች ሀገር!!"
"እኔን ነው! አለ እከ!!
ወገሬት!!

"እ ድ ሜ ለ ማ ር ክ ዙ ከ ር በ ር ግ "

"እ ድ ሜ … ለ ማ ር ክ … ዙckerbueg"
#ሳteናw
ድሮ ድሮ የሀገሬ ኢንተርኔት ቤቶች እንደ ቁጥራቸው ተጠቃሚያቸውም ውስን ነበር። ተጠቃሚዎቹም ወይ ድግሪ ወይ ማስተርስ ያላቸው ጥቂት የተማሩም ሰዎች ነበሩ። በዚህ የመጣ የኢንተርኔት ቤት ወንበሮች በተጠቃሚ እጦት ከሰው ይልቅ በአቧሯ መርግ ይሞሉ ነበር። ድሮ ነው ታዲያ… ዛሬስ? እድሜ ለማርክ ዙከርበርግ የተማረውንም ፣እንደኔ ያለው ቴንኘላስ ምላስ የሆነውም፣ ፊደል የቆጠረውንም በፌስ ቡክ ሰበብ ኢንተርኔት የተባለውን ቴክኖሎጂ እንዲጠቀም፣ ኢንተርኔት ቤቶችን በተጠቃሚም፣ በገቢም እንዲጨናነቅ ላደረገው አሜሪካዊው ጉብል፣ እድሜ… አዋራ አራግፈህ ትጠቀምበት የነበረው የኢንተርኔት ቤት መቀመጫ፣ ዛሬ እንደቆመ ባስ ተሳፋሪ የሚለቀቅ ወንበር ጠብቀህ የመጠቀም ወጉ እንዲደርስህ ላደረገው ወጣት ማርክ።
እርግጥ ነው አልዋሽህም!! ፌስቡክ ፌብሩዋሪ 4/2004 ከመወለዱ በፊት የቀደሙ ማህበራዊ ድህረገፆች እንደነ yahoo… gmail ቢኖሩም ተጠቃሚያቸው እንደ ዛሬው ሰፊው ህዝብ አልነበረም።

[(በነገራችን ላይ የፌስ ቡክ መለያ ቀለም ለምን ሰማያዊ እንደሆነ ታውቃለህ? መስራቹ ማርክ ዙከርበርግ ቀይና አረንጓዴ ቀለም አይቶ የመለየት ችግር ስላለበት ነው። አሉ ነው። ማጣራቱ ያንተ ፋንታ ነው! ለማንኛውም ይህን ምርጥ ልጅ በፌስቡክ ማግኘት ካሰኘህ መደበኛው የፌስቡክ አድራሻ ላይ 4 ቁጥርን ጨምረህ( facebook.com/4 ) ፈልገው ከደማቅ ፈገግታው ጋር ታጅቦ ድቅን ይልልሃል። 5 እና 6 ካስገባህ ደግሞ መስራች ጀለሱካዎቹን ታያለህ)]

ፌስቡክ ከመጣ ወዲህ የኢንተርኔት ተጠቃሚው እንደ አሸን ፈልቶ ቁጥሩም አደገ። አድገ ስልህ የፊስቡክ ተጠቃሚ እንጂ የነብስ ወከፍ ገቢ እንዳልሆነ መቼም አታጣውም። ዛሬ ላይ ህዝቤ የከበደው የፌስቡክ መክፈት ሳይሆን የባንክ አካውንት መክፈት እንደሆነም አይጠፋህም።
የጋራችን አለም ድሃና ሀብታሙን በኑሮ ደረጃ ብትለያየውም፣ ኪስን ሳያይ አንድ አድርጎ ፌስቡክ ሰበሰበው። አብዛኛውን ሰው ይህን ተከትሎ ከፌስቡክና መሰል ድህረገፆች በደንብ ተዋወቀ። ይህን ቀድሞ የባነነው ቴሌም ኢንተርኔትን ወደ የሞባይላችን መስኮት አቀረበው። ግንምን ዋጋ አለው? ፌስቡክ አንድ ቢያደርገን፣ ቴሌ በሞባይል ካርድ ፍጆታ አራራቀን። ድሮስ ጠላት ከሩቅ አይመጣ!!

ፌስ ቡክ የተራራቁ አህጉራትን፣ ለቡና እንደምትጠራራው ጎረቤት አቀራርባል። በተለያየ የአለም ክፍል ያሉ ሰዎችን በአንድ ሰሌዳ አሰባስቧል። አንደኛውን አለም ከሶስተኛው አለም በአየር ላይ ምንኗኗረውን ሌላ አለም ፈጥሯል። የመረጃ ልውውጡም በዛው መጠን አሳድጓል። የአለም ትኩስ ዜናዎችን በየሞባይል እስክሪንህ ላይ ገና የትኩስነት ጭሳቸው እየተንፎለፎለ አንኳኳተው ከች ይሉልሃል።

እናልህ…! ከዚህ ከፌስቡክና መሰል ማህበራዊ ድህረገፆች ጋር መምጣት ተያይዞ ብዙ ለውጥ በሀገራችን መጥቷል። መልዕክት ለመለዋወጥ ፖስታ ቤት የፖስታ ሳጥን ከመክፈት በተንቀሳቃሽ ስልክህን ወይም በዴስክ ቶኘህ inbox ወደ መክፈት አሸጋግሯል። ወጣቱን ፎቶን በዋሌት ቦርሳው ከማስቀመጥ፣ ፌስ ቡክ ላይ ወደ ማስቀመጥ አራቆታል። በዚሁ ሰበብ ጠበሳውም፣ጅንጀናውም ንሯል። ለመጠባበስ የፕሮፋይል ፎቶዎች በእጅ ስራ ጥበብ፣ ተወልውለው፣ተኩለው አምረዋል። ይህን አይተህ፣ከአንዷ ጋር ተቀጣጥረህ በአካል አግኝተህ ስታያት ፎቶው የራሷ መሆኑ ያጠራጥርሃል። ወይም ቀጥረህ ስጠብቃት የውሃ ሽታ ከሆነችብህ ወንድ በሴት አካውንት ተሞዳምዶብህ ይሆናል። በዚህ አላበቃም የአየር ላይ አለማችን፣ ጥንዶችን አየር ላይ ኘ አግባብቶ፣ በገሃዱ አለም አጋብቶ አዋልዷል። በዛው መጠን ሰላማዊ የነበረን ትዳር አበጥብጧል። ተግባብቶ የተጋባውን፣ባለመስማማት ግራ አጋብቶ አፋቷል።

ቺክ ለመጥበስ በፍራቻ ብዛት ቃላት ያጥረው የነበረው ሰውዬ፣ ዛሬ በፌስቡክ ጠበሳ አንድ ፊደል ሲፅፍ የቃላት አማራጭ የሚገጠግጥለት ኪቦርድ ገላግሎታል። በሌላ በኩል በተደረገው ጥናት ኢንተርኔት መሀይምነትን በተወሰነ ደረጃ ቀንሷል። በፅሁፍ መልእክት ለመግባባት ለግዱ Amharic english የፈደል ገበታ እንዲያጠና አስገድዶታል። በፊት በወር አንዴ የምትጠብቀው ከዘመድ አዝማድ የሚደወል የውጪ ስልክ፣ ዛሬ በየደቂቃው ሆኗል። እድሜ ተያይዘው ለመጡት ለነቫይበር፣ለነ ዋትስ አኘ ና ኢሞ፣ የተጠፋፋውን ወዳጅ አገናኝቷል። የተራራቀን ቤተሰብ አቀራርቧል። የመኝታ ቤት በርህ ሳይንኳኳ፣ ከሳሎን "እራት ደርሷል ና ትባላለህ … በኦን ላይን።

ይህ መልካም ሆኖ ሳለ የነፃነቱ ልክ ወሰን አልፎ ስድ ነገሮችንም፣ ድርቅ ያሉ ውሸቶችንም አቅፏል። ከዌብ ሳይታቸው የሸሸሃቸው አፀያፊ ተንቀሳቃሽ ምስሎች በጋጠ ወጦች ተፖስቶ ሳትፈልግ በፌስቡክህ ላይ ገጭ ይሉብሃል። ከላይ የሀይማኖት ትምህርት እያነበብክ ከስር ይሄ ጉድ ብቅ ይላል። ቤቱ ተቀምጦ ከልጆቹ ጋር የሚፈነድቀውን ታዋቂ ግለሰብ "ሰበር ዜና! አከሌ አከሌ ዛሬ አረፈ? ይሉሃል። ውሸቱም በዛው ልክ ነው፣ የዜናውን እውነት፣ እንደ ወርቅ ማዕድዕን ከጭቃ እንደሚጣራው አጣርተህ ማረጋገጥን ይጠይቃል።

[(በነገሬ ላይ አፀያፊ ምስሎችን በአካውንትህ ላይ እንዳይለጠፍብህ ለማድረግ setting ግባ timeline and tagiging ግባ who can post your timeline? ግባ only me አደርገው አለቀ።)]
አንድ ሰው ሶስት የፌስ ቡክ አካውንት በመክፈት አንድም ሶስትም መሆንን ችሏል። በዚህ የመጣ ከ8—10 % የሚሆኑት የፌስቡክ አድራሻዎች ፌክ ናቸው። በፌስ ቡክ አንድ ሰው ከፈለገ የሀይማኖት መምህር፣ ልቅና ስድ፣ ደፋ ር ፖለቲከኛ ይሆናል። በገሀዱ አለም አዋቂ ነው ትውልድ የሚያቀና ነው የምትለው ሰውዬ በነ ፌስቡክ ትውልድ የሚያበላሽ ቪዲዮ ይለቅብሃል። አመለ ብልሹ ያልከው በፌስቡክ ላይ የሀይማኖት መሪ፣ እኔ ብቻ አዋቂ የሚል ይሆንብሃል። ማንነትን እንዳሻህ ለመከረባበትም ፌስቡክ ሁነኛ መድረክ ሆኗል። ደግሞ የቤቱን አመል ይዞ ፌስቡክ የሚመጣብህም ሞልቷል።

መች በዚህ በቃ በግልፅ የማታደርጋቸው ድርጊቶ፣ ማህበራዊ ድህረ ገፅ ማድረግ አስችሏል። ማንነትህን ደብቀህ ባለስልጣንን በፔጁ በኩል ብትኮንን፣ ግፋ ቢል አካውንትህን የመሰበር ሙከራ ይደርስበታል እንጂ፣ ማእከላዊ ታጉረህ በዱላ ብዛት እግርህ አይሰበርም። መንግስትን ለመቃወም ከድንጋይ ከመወርወር ወደ ቃላት መወርወር አሸጋግሯል። ይህም ከመንግስት ሀይሎች የሚመለሰውን የጥይት ቃንቄ አስቀርቷል። እንደምታውቀው ሀያል መንግስታት በሶሻል ኔት ሰበብ ተገርስሰዋል ግብፅና ቱኒዚያን መውሰድ ትችላለህ። ይህ ውጤት የሰራው እንደኛ በበነነ ተነነው ለተለያየ ህዝቦች ሳይሆን፣ በአላማ አንድ ለሆነ ህዝብ ነው። እናልህ! … ከአንባገነን መንግስታት የታጣውን በነፃነት ሀሳብን የመግለፅን መብት ፌስቡክ መልሶታል። ሀሳብን በነፃነት ከመግለፅ በላይ ምን የህሊና እረፍት የሚሰጥ ነገር አለ?። ይሄው እኔስ ዛሬ ሃሳቤን ማካፍልህ በዚሁ ፌስቡክ አይደለም? ነው።

እንግዲህ እነዚህንና ዘርፈ ሰፊ ለውጥ በፌስ ቡክ ሰበብ ተፈጥሯል። ይህን ዘርፈ ሰፊ ለውጥ ለበጎም ለክፉም የማዋሉ ስልጣን በመዳፋችን ላይ ነው። በፌስቡክ መማማር፣ ጠቃሚ ሃሳቦችን መለዋወጥ፣ የሚቻለው እንደ አጠቃቀማችን ነው። ለአንድነት፣ ለነፃነት፣ ለመልካም ለውጥ፣ ለተሻለ አስተዳደር ጥቆማ ወዘተ ለማዋል አድርገን የምንዘውረው እኛው ነን። ድንቁ ማርክ ያበረከተልንን በዚህ ቴክኖሎጂ አጠቃቀማችን ለጋራ ጥቅማችን ቢሆን ድንቅ ይሆናል!! እላለው። ለማንኛውም የፌስ ቡክና መሰል የማህበራዊ ድህረ አጠቃቀማችን ያሳምርልን!! ከማለት ውጪ ምን ማለት ይቻላል? ምንም!!
ወገሬት!!