" የ ም ሞ ተ ው ዛ ሬ ማ ታ … "

#ሳteናw

… አንተ አኔን ልትውሸደኝ? አለው ቡፌት በስራ የመጣ አለመግባባት ከተፈጠረበት ሌላኛውን የመሿለኪያ አባል ሙልጌን፣ ሊሸውደው ያደረገው ጥረት አማሮት…

… አታውቀኝማ ምን ታደርግ? መርካቶን ከፀጉር እስከ ጥፍሯ፣ ሸገርርን ከአፍ እስከ ቂጧ እንደ ማውቃት? ብሽቅ "ከች" ነትን (መጤነትህን) ረስተህ ለዚህም በቃህ? ጉድ ነው "ጋኖች አለቁና፣ ምንቸቶች ጋን ሆኑ" አሉ የሆንክ ጋን ነገር።

ሙልጌ እንደ ላውንቸር ያለ ማቋረጥ የሚንካካውን ሳቁን አጅቦ ለሌላ ሳቅ የሚጋብዝ ጥያቄውን ጣል አደረገ።
"ካካካካ የሸገር አፏ የት ነው? ቂጧስ?"

"እንደሱ ነዋ ሚባለው! አለማወቅህን አውቀህ፣ ለማወቅ መጠየቅህ በራሱ አዋቂነት ነው…
"ለቀማንድህን ትተህ አስኪ… ?" በመልሱ ለመሳቅ ጓግቶ … ሙልጌ

"አፏ ያው ልክ እንዳንተ አፍ ከጧት እስከማታ ጫት ስለማያጣው ጫት ተራ ነው። ቂጧ ደግሞ ቆሼ!።

በምልልሳቸው እንደ ጠረጴዛ ቴኒስ ጨዋታ ተመልካች አንገቱን ከቡፌት ወደ ሙልጌ፣ ከ ሙልጌ ወደ ቡፌት  ያመላልሱ የነበረው የመሿለኪያዋ ወጣቶች። በቡፌት መልስ ሳቃቸውን አፈነዱት… ካካካካከካካ…

   የመሿለኪያን ወጣት አባላት ለየት የሚያደርጋቸው ይህ ነው። ምን አለመግባባት በመካከላቸው ቢፈጠር ይተላለፋሉ። በቀልድ አጅበው መሳቂያ ያደርጋሉ እንጂ ለፀብ ብሎም ለቂም አይገባበዙም። ዛሬም በቡፌትና በሙልጌ መካከል የተፈጠረችው አለመግባባት በቀልድ ተዋዝታ ተደመደመች።

"አረ ባካችሁ ሳቅ ቀንሱ ሼም ነው! ቆሼ ተብሎ ሚታወቀው አካባቢ የቆሻሻው ክምር እንደ በረዶ ግግር ተንሸራቶ ላለቁ ሰዎች የሀዘን ቀን መታወጁን ዘነጋችሁት እንዴ? ቀዥቃዣው ሳተናው ነበር ከልቡ በሆነ ስሜት ጓደኞቹን የገሰፀው።

" በጣም ያሳዝናል? እኔ መጀመሪያውኑ እዛ አካባቢ መኖሪያ ቤት መገንባቱ እራሱ ገራሚ ነው። ለመሆኑ በመንግስት የተመራ፣ ለኑሮ ምቹነት በመሀንዲንስ ቦታው የተጠናና  ይሁንታ የተሰጠው ስፍራ ነው?  እኔ ይህን ለማመን ይቸግረኛል!" አለ አንዱ አባል።

"አዎ ልክ ነህ አደጋው የደረሰባቸው ቤቶች በመንግስት እውቅና ያላቸው ባይሆኑም በዛው አቅራቢያ ህጋዊ ቤቶች አሉ ሲባል የሰማው መሰለኝ፣ ቦታው እኮ እንኳን ለዚህ ዘመን ሰው፣ ከግዝፈታቸው የተነሳ ዛፍ ባአንድ እጃቸው ከስሩ መንግለው መንቀል ይችሉ ለነበሩት ለነቢዩ ሁድ ህዝቦች እራሱ አስጊ፣ ነው … ሳተናው ነበር።

"ከአደጋው ቡሃላ ከንቲባው ከስፋራው ተገኝተው የሀዘን ተካፋይ መሆናቸውና፣ በመግለጫቸውም አደጋው ለደረሰባቸው ቤተሰቦች ሀዘናቸውን መግለፃቸውን አልሰማህም?"

"ያሳዝናል!! ነዋሪውም ቢሆን በዛ ለጤና ጠንቅ  ለህይወት አስጊ እንደሆነ ባወቀው ስፈራ ላይ፣ "ናዳ መጣብህ ቢሉት፣ ተከናንቤያለው" እንዳለው ሞኝ ሰውዬ አይነት ነገር ቤት መገንባታቸው…"

"… በነሱ አይፈረድም በከተማዋ ያለው የመኖሪያ ቤት ችግር ነው፣ "መጀመሪያ መቀመጫዬን" በሚለው ብሂል ሄደው ነው በዚህ አደገኛ ቦታ ለመኖር ያስገደዳቸውና ህይወት ዋጋ ያስከፈላቸው።" አለሰያ ነጭ ሽንኩርት የዘወትር ልማዱን የኤር ፎን ገመድ ለመቀጠል እየቋጨ።

"ይሄ የከተማችንን የመኖሪያ ቤት ችግር ምን ያህል እንደሆነ የሚያሳይ ነው…

የከንቲባው ከቦታው መገኘት፣ ከዛ ቡሃላ ከተለያዩ አካላት ከአደጋው የተረፉትን መልሶ ለማቋቋም የተደረገው ርብርብ ይበል የሚያሰኝ ነው… ከንቲባው የተረፉትንና፣ እዛው አካባቢ ላሉ ነዋሪዎች፣ ቦታው ለመኖሪያነት የማይመችና፣ ለአደጋ የተጋለጠ በመሆኑ ሌላ ስፍራ እናዘዋውሯቿለን አሉ! አሉ።

ዘ ይግረም! ነው! እኔ እኮ የሚገርመኝ ይሄ ባህላችን እኮ ነው። አደጋ ከደረሰ ቡሃላ የምንረባረበው ነገር…  አለ በብስጭት …

"እንዴ ሌላው የራሱ ችግር ቋቅ ያለው ህዝብ የነሱን ችግር፣ ቀድሞ በምን ያውቃል?"

… ህዝቡን አላልኩም፣ አስተዳደሩን ነው። ነዋሪዎቹ ከአደጋው በፊት ስጋታቸውን ለሚመለከተው አካል አመልክተው ነበር! አሉ ግን ምላሽ አልነበረም።
በእውነቱ ከሆነ ነዋሪው ከማመልከቱ በፊት ቅድሚያ ሊገነዘቡ የተገባ ነበር። ግን ምን ታደርገዋለህ… ሁሌ እንደሞኝ ከስህተት እንጂ ከመጀሪያው ሊሆን ይችላል በሚል እንደ በሳል አዕምሮ  አይገመትም እኮ። … ትላንት የነዋሪው ስሞታ ላሽ ተብሎ፣ የሀዘን ቀን ማወጅ… ቀድሞው ነው እንጂ አልሞ መዶቀስ…አሉ።

አሁን በማን ሞት ከሚመለከተው አካል ውጪ ለዚህ አደጋ ሀላፍትናውን የሚወስደውስ ማን ነው?  አይ ሲስ ወይም ቦኮሀራም? እንዳልሆኑ መቼም ግልፅ ነው… ችግሩ ከሚመለከተው አካል ፈጣን ምላሽ   አለማግኘት ይመስለኛል። ግን እውነት እናውራ ካልን ጉዳዮቹ ቀድመው የሚደፍኑት ቀዳዳ አላቸው !"  አለ አንዱ

"ምንድነው ደግሞ?" አሉ ሁሉም የተመካከሩ ይመስል በአንድ ድምፅ፣ በተሰላቸ ሌላ መርዶ ለመስማት በተዘጋጀ መንፈስ።

"… የፑተለካው ጉዳይነዋ ። በዛ በኩል ፈጣን ናቸው። ከትራንስፎርሜሽኑ እቅድ በእጥፍ እጥፍ እጥፍ  ይቀድማሉ። እንቅፋት ነው ብለው ያገኙትን፣ ምን ያገኙትን የተጠራጠሩት ቀዳዳ በፈጥነት ይደፍኑታል፣ ያዳፉታል ወህኒ ወስደው በሩን ያዳፍኑበታል። አንቀፅ እየደረደሩ የክስ መዝገቡን በአንድ ሺህ ገፅ ይጠርዙለታል። በዶክመንተሪ ፊልም ጥላሸት የመቀባት ስም ማጥፋት ዘመቻ ያፋፍሙበታል። እድሜ እንደ ዳትሰን ሰፈር ደላሎች ጤፍ የሚቆላ ምላስ ላላቸው ልማታዊ ጋዜጠኞች፣ ሆሆሆ።  ከዚህ ውጪ ያሉ ጉዳዮች ቀድሞ ምላሽ የመሰጠት ዕድል የላቸውም። ብቻ ያሳዝናል በስንቱ ኡኡኡ እንደሚባል!   ምንጠይቀው የዛሬ ችግር፣ የእነ ጀለሴ የመልስ ለትናንት። ከህዝብ ጋር እኩል እየተራመዱ አይደለም!!  የትላንቱ አይደፈን ማለት አይደለም ይደፈን፣ ጎን ለጎን የዛሬውም ቢደፈን። እንደ ወጉማ ቢሆን መሪነት በራሱ ከህዝብ ፊት ሆኖ መምራት ነበር!! ጉዳዩ ግን ተገላቢጦሽ ሆኖ ተመሪው በብዙ እርምጃ ከፊት ዛሬ ላይ ቆሞ።፣ እንደ መጥምቁ ዮሃንስ በምድረ በዳ ሰሚ የሌለው ጩኸት ያሰማል። ዛሬ ሰሚ ቢኖር በስንት ጠዓሙ።

ባካቹ ተውት "የምሞተው ዛሬ ማታ፣ ገብስ የሚደርሰው ለፍልሰታ" አይነት ነገር ነው። የኛ ጉዳይ!!  እንደው እኩል ያራምደን ብሎ ከመፀለይ ውጪ ሌላ ምን ይባላል?"
"ምንም" ሲሉ በህብረት መለሱ።
ወገሬት!!!

"መሿለኪያና መሿለኪያዎች"

#ሳteናw

በወራሪው ጣሊያን በተመሰረተችውና በአፍሪካ ገላጣ ገበያነት ግንባር ቀደም በሆነችው መርካቶ ውስጥ…  ሁሉንም እንደ አቅሙ በማኖር የእናትነት ሚና ተጫዋች በሆነችው መርካቶ እንብርት ተመስርታለች …ማን?   ቀስ በል ምን የሚያስቸኩል ነገር አለ!!

ኪስን ሳታይ እኔ ነኝ ያለውንም ቱጃር፣ ያጣ የነጣውንም  ጠብሻም በየደረጃው አብልታ አጠጥታ በምታሳድረው መርካቶ… ውስጥ… የአፍሪካ ህብረት መቀመጫ መዲና አዲስ አበባ የኢኮኖሚ ሞተሯ በሆነችው መርካቶ ክልል ትገኛለች… በመሀል አዲስ አበባ በ17 ካሬ የሰፈረች በመኖሪና በሱቆች የተጥለቀለቀች በሆነችው በእምዬ መርካቶ… ወጣት አባላቶቿን [መሿለኪያዎችን] በፍቅሯ፣ ሰብስባ፣ ውስጧ በሚሰፍነው፣ መረዳዳት ናፍቆት ጫሪ የሆነች አንድ ሰፍራ ነች … መሿለኪያ።
 
… ከዳርና እስከ ዳር በተገጠገጡ ንግድ ቤቶች መሀል ድንገት የምትገኝ፣ ጣራና ግድግዳዋም ድፍን የሆነች ዋሻ፣ በመሆኗ ነው መሿለኪያ የሚለው ስያሜ በአባላቿ የፀደቀላትም ናት መሿለኪያ።

መሿለኪያ ወጣት የነብር ጣት ለሆኑ የመርካቶ ወጣቶች መሰብሰቢያ፣ ደስታም ሀዘናቸውን፣ ማሳለፊያ፣ ቢያገኙም ቢያጡም፣ መዋያ። መወያያ፣ መማማሪያና፣ መረዳጃ ማዕከላቸው ናት።

  መሿለኪያዎች በተለያየ፣ የእድሜ፣ የእምነት፣ የገቢና የትዳር ሁኔታ ላይ ይገኛሉ። በጠቅላላ ወንዶች ናቸው። ከመሿለኪያ ጋር በያዛቸው ፍቅር ሰበብ፣ በአዘቦት ቀናት ከስራ ቡሃላ፣ በእረፍት ቀናት፣ በበዓላት ቀናት ሳይቀር፣ ከዋሻዋ አይጠፉም፣ በዚሁ ሳቢያ ለማህበራዊ ህይወት የሚሆን ትርፍ ጊዜ ባይኖራቸውም፣  ከማህበራዊ ኑሮ የወጡም፣ ቢሆንም ቅሉ በመሿለኪያ የራሳቸውን ማህበረሰብ መስርተዋል።  በመሰረቷት መሿለኪያ ውስጥ ያለው ግንኙነት ለሌላው ህብረተሰብ አርዓያ መሆን የሚችል የኢትዮጲያዊነት ስሜት ያለውና በህረተሰቡ ውስጥ የሚታየው፣ የጠባብ ብሄርተኝነት፣ በለው የጎሳ ልዩነት፣ የሚባሉ ዝባዝንኬዎች በመሿለኪያ ጣሪያ ስር፣ ሞተው የተቀበሩ ናቸው። አንዱም ይህ ነው መሿለኪያዎችን ለየት የሚያደርጋቸው የአስተሳሰብ ልኬት። የመሿለኪያ ወጣቶች፣ እርስ በእርሳቸው፣ ያለ ልዩነት ይዋደዳሉ፣ይረዳዳሉ። ለመሰብሰቢያ ማዕከላቸው መሿለኪያም ልባዊ ፍቅር አላቸው።

በአጋጣሚ አንድ አባል አስገዳጅ ሁኔታ ገጥሞት ከመሿለኪያዋ ቢርቅ፣ በናፍቆቷ ሟች ነው። አስሬ እየደወለ በሀሳብ መሿለኪያ ለመሆን የሚያደርገው ጥረት የማይቀር ጉዳይ ነው።

ይህ ቁርኝት ያለ ነገር አልሆነም። ወጣቱ በመሻለኪያ ውስጥ ነፃነት አለው፣ ሀሳቡን ለአባላት የመግለፅና የማስተላለፍ፣ የራሱን ፍልስፍና የማካፈል፣ ታመነበትም አልታመነበት የመደመጥ እድል አለው።  በመካከላቸው ያለው የእርስ በእርስ መተሳሰብ፣ አንድ አባል ሲቸገር የሚደረገው መረዳዳት፣ በደስታውም በሀዘኑም ከጎኑ የመቆሙ ባህሉም ጭምርም ነው መሻለኪያን ተፈቃሪና፣ ተናፋቂ ያደረጋት። ይህ ብቻ አይደለም፣ የመሿለኪያዎች ባህሪይ በስራ እንቅስቃሴያቸው ከተለያዩ ስዕብናዎች ጋር የሚያገኙትን ልምድ፣ በትምህርት የተደገፉ፣ ብሎም ከመገናኛ ብዙሃን፣ ከመፅሃፍት፣ ከኢንተርኔት፣ የሚገኙ መረጃዎችና፣ እውቀቶች በሙሉ በመሿለኪያ ስብስባቸው አምጥተው የመወያየት ባህል በማዳበራቸው፣ መሿለኪያን፣ ሁሌ በተለያየ አጀንዳና ሁኔታ ስለሚያሳልፏት፣ የፍቅሯ እስረኛ አድርጓቸዋል። የእርስ በእርስ፣ መረዳዳት፣ መተዛዘን ለአንዱ ደስታ፣ ሌላው በደስታ መስዋዕት መክፈል፣ የመሿለኪያ ወግ ልማድ መሆኑ፣ የሰነባበተ ጉዳይ ነው።
ዛሬ በሀገራችን የተንሰራፉት የዘር፣ የሀይማኖት ወዘተ… ልዩነቶች መሿለኪያ ውስጥ አባልን ከአባል የሚለዩ ወሰኖች ሆነው በፍፁም አይገኙም። ለሀገር ለወገን ጠቃሚ የሆኑ ሀሳቦች፣ በተለያዩ ዘርፎች ልምድና እውቀት ባላቸው መሿለኪያዊያን ይብላላሉ፣ ወደ ተግባር ለመለወጥ፣ የሚችሉትን ያደርጋሉ።

   ሲጠቃለል መሿለኪያ በአራት ግድግዳ የተወሰነች ስፍራ ትሁን እንጂ፣ ለመሿለኪያዎች የሚሰበሰቡባት መሰብሰቢያ አዳራሻቸው ነች። መወያያ መመካከሪያ፣ ውሳኔ በድምፅ ብልጫ የሚያፀድቁባት ፓርላማቸው ነች። መብያ፣ መጠጫ፣ ቀልድና ቁምነገር መጨዋወቻ፣ መዝናኛ ስፍራ ነች። እርስ በእርስ የሚረዳዱባት የቴሌቶን መድረካቸው ነች። ወቅታዊ፣ አለም አቀፋዊ ሀገራዊ መረጃና ዜናዎች የሚለዋወጡባት፣ የሚሰሙባት፣ የሰሙት የሚያካፍሉባት መገናኛ ብዙሃናቸው ነች። መሿለኪያ ለመሿለኪያዎች ይህ ሁሉ ነገራቸው ነች ቢባል ግነት እንዳልሆነ በቀይ ብዕር ይሰመርበት። ታዲያ መሿለኪያዎች በእረፍት ቀን፣ በበአል ቀን ሳይቀር ሁሉም ነገር  በምትሆንላቸው መሿለኪያ ከማህበረሰቡ ሸሽተው መሰብሰቡ ሱስ ቢሆንባቸው፣ የሚገርምህ ነገር ነው? አይደለም!!
ወገሬት!!

"ም ር መ ራ"

"ምርመራ"
#ሳteናw

…የተናፈሰውን አሉባልታ በሰማ ቅፅበት ሙዱ ተቦክሞበታል። የወደፊት ምኞትና ተስፋው፣ በአንዴ ጨለማ ሲለብስ ይታየዋል። ወይኔ ጉዴ!! ይላል አስሬ በሆዱ። ይኼን እንዴት እስከዛሬ ሳልገምት ቀረው? ለነገሩ ቀድሜ ባውቅስ ምን አዲስ ነገር ይኖራል? የስቃይ ዘመን ከማራዘም በቀር? እያለ ያሰላስላል። ወሬውን ውጪ ቢሰማውም፣ አሁን መሿለኪያ ውስጥ ተቀምጧል። መሿለኪያዎች የሚያወሩትን የወሬ ግንጣዮች ይሰማል እንጂ አያዳምጥም። አካሉ መሿለኪያ፣ ልቡ ሌላ ቦታ።

እንደዛሬ ሳይለያዩ፣ የረገጥከውን፣ የረገጥሺውን፣ አልረግጥም ሳይባባሉ በፊት ያሳለፉትን  ጊዜያቶች አንድ በአንድ ያወጣ ያወርድ ጀመር። "መንስኤው እኔ ነኝ ወይስ እሷ?"፣ ደውሎ አሉ ባልታውን እንዳይጠይቃት፣ አይንህ ላፈር፣ አይንሽ ላፈር፣ ተባብለዋልና ምን ያድርግ ። ከሷ ውጪ አያውቅም። ጨንቆታል፣ ጠቦታል። በፍርሃት ብዛት ሆዱ ተንቦጫቦጨ። ደህና የነበረው ልጅ አስሬ አተት እንደያዘው ሰው ሽንት ቤት አበዛ። ቆመ፣ ተቀመጠ፣ ተንቆራጠጠ። ይህ ለራሱ ባይታቀውም፣ ለመሿለኪያዊያን ግልፅ ነበር። ሁኔታው አዲስ የሆነበት ሰያ ነጭ ሽንኩር "ጓድ!ምን ሆነሃል?" ሲል ጠየቀው።
እውነቱን ነግሯቸው ስጋቱ ስጋታቸው እንዲሆን፣ አልፈለገም። ሳያረጋግጥ፣ ማውራቱን አልወደደም። ቢነግራቸው አሁኑኑ ማወቅ አለብህ በሚል በመሿለኪያዊያን ውሳኔያቸው አንጠልጥለው፣…  እንደሚወስዱት፣ አላጣውም።

"ምንም ብዙ ውሃ ስለጠጣው ነው መሰለኝ ውሃ ሽንት ቶሎ ቶሎ ይመጣብኛል" አለ ሌላ ጥያቄ እንዳያስከትሉበት… በመስጋት።

። ቤቱ ከመግባቱ በፊት፣ አሉ ባልታው እውነት ይሁን ውሸት ማረጋገጥ መቻል እንዳለበት ያውጠነጥናል ፣…  አለበለዚያማ ልተኛ አይደለም። በሀሳብ ስንገላታ እንዲሁ ማደሬ ነው" ሲል ዛሬውኑ ማወቅ እንዳለበት ወስኗል። ሌላ ቀን ያጥርበት የነበረው  የመሿለኪያ የቆይታ ሰዓት፣ ዛሬ አልሄድልህ ብሎታል ወይ አምላኬ! ግን እንዴት? ባለፈው ታዲያ ስጠይቃት፣ ምላሿ እንደዛሬው አሉባልታ ለምን አልሆነም? እያታለለችኝ ነበር ማለት ነው?  ወይስ እየተበቀለችኝ?" ይላል ለራሱ።
ለወትሮው በቃንቄ ምላሱ መሿለኪያን ይቆጣጠር የነበረ ልጅ ዛሬ በጥልቅ ዝምታ ውስጥ መሆኑ ለመሿለኪያዊያን አዲስ ነገር ሆኖባቸዋል።

"አረ!!…ፍሬንዴ ዛሬ ምላስህ ላይ ነው እንዴ የተቀመጥከው??" ከቡፌት ነቆራ አላመለጠም። ምላሹ ከልቡ ያልሆነ ፈገግታ ማሳየት ነበር።

ከዚህ ሁሉ ለምን ቶሎ ሄጄ፣ እውነቱን አላረጋግጥም? ያበጠው ይፈንዳ!!" ብሎ ያለ ሰዓቱ መሿለኪያን ለቆ ወጣ። በመንገድ ላይና፣በታክሲ ውስጥ ያሳለፈውን ጊዜ ሳያስተውል ከሰፈሩ ደረሰ። በአቅራቢያው ካለ መካከለኛ ክሊኒክ ገባ።

ወጣት የጤና ባለሙያ በፈገግታ ተቀበለው።
"ምን ነበር?"
"… ምርመራ ለማድረግ ነበር። አለ ድንጋጤ ባርገበገበው ድምፅ።
"ሰባ ብር ነው"።
"ችግር  የለም!! ስንት ደቂቃ ይፈጃል ግን?" ያሰጋው ዋጋው ሳይሆን፣ ጊዜው ነበር።
"ከአስራ አምስት አስከ ሃያ ደቂቃ ቢወስድ ነው!! ሲለው በጭንቅላቱ ንቅናቄ መስማማቱን፣ ሲገልፅለት… እሺ አንዴ ጠብቀኝ ብሎት ወደ ሌላ ክፍል ሄደ ። እሱም ወደ እንግዳ ማረፊያው፣ ገባና ተቀመጦ ጠብቀው። ወጣቱ መርማሪ …ጓንት፣ መርፌ፣ የአልኮል ብልቃጥ፣ ጥጥ እና የደም ናሙና መመርመሪያ (ኪት) በእጁ አንጠልጥሎ፣ ተከተለኝ በማለት ወደምርመራ ክፍል ይዞት ገባ።  እውነቱን ለማወቅ በቀረበ ቁጥር የልብ ምቱ እጥፍ ሆኗል።

ከምርመራው ክፍል ገብቶ እንደተቀመጠ  የሸሚዙን እጅጌ ክርኑ ድረስ ሰብስቦ ተዘጋጀ። ካሁን አሁን መጅ የሚያክል መርፌ ሲጠብቅ… መርማሪው… ጓንት፣  አልኮል በራሰ ጥጥ፣ የቀለበት ጣቱን፣ አሽቶ አፀዳለትና፣ በትንሽዬ ስለታማ ነገር ጠቅ፣ አደረገው ወገው ፣ደም ከየት ይምጣ? … ይቅርታ በአይኑ ጠይቆት ጠቅ ደገመው፣ ጣቱንን አልመዝምዞ አልመዝምዞ፣ በስንት ምጥ የደም ጠብታ፣መመርመሪያዋ ላይ አደረገው። እሱ ደግሞ የተበሳችው ጣቱን በጥጡ ይዞ… ባለሙያውን በአይኑ ይከታተል፣ ጀመር…

በብልቃጥ ያለ ፈሳሽ  የደም ጠብታው ላይ ጠብ አድርጎ፣ ውጪ እንዲጠብቀው ነገረው። ወጣ። ወና የሆነው እንግዳ ማረፊያ፣ ቴሌቪዥኑ ብቻ ይጮህበታል። ተቀመጦ ውጤቱን ይጠባበቅ ጀመር።
የምርመራ ክፍል ውስጥ የተመለከታት የመመርመሪያ መሳሪያ ትንሽነትና፣ ቅለት፣ በትክክል መስራቷ አጠራጥሮታል። ይሁን እንጂ መሳሪያዋ፣ ዓለም አቀፉን ዝቅተኛ መስፈርት አያሟላም ተብሎ የነበረ ቢሆንም፣ የኤች.አይ.ቪ /ኤድስ/ መመርመሪያ ኪት በብቃት አገልግሎት መስጠት እንደሚችል በተደረገለት የጥራት ፍተሻ ተረጋግጧል።

ባሙያውም ውጤቱን ለማወቅ ጥቂት ደቂቃ  መጠበቅ ስለነበረበት፣ እንግዳ ማረፊያው መጥቶ አብሮት ተቀመጠ።
… ምክር ምናምን የሚጀነጅነው መስሎት፣ ፊቱን ዘፈዘፈው ፣እትት ሳይባል ውጤቱን ተነግሮት ብቻ ነው፣ መሄድ የፈለገው። ፍላጎቱ ተሳካለት። ባለሙያው ምንም አላለውም።(መርቅኖ ይሆን?)… አይኑን አንዴ ቲቪ ላይ፣ አንድ ጊዜ ግድግዳው ላይ የተለጠፉ ምስሎች ላይ ማንከራተቱ ሲሰለቸው፣ ተንቀሳቃሽ ስልኩን አውጥቶ መነካካት ያዘ። ማህበራዊ ድህረገፅ ከፍቶ ማየቱ  ሃሳቡን በደንብ ሰበሰበለት። የጭንቀት ሰዓቱንም አሳጠረለት። ስንት ደቂቃ እንደሆነ ሳያስተውል፣ አጠገቡ የነበረው ባለሙያም ወደ ምርመራ ክፍል መግባቱንም ልብ አላለም። ከነበረበት ተመስጦ፣ ድምፅ አባነነው። ከሞባይል ስክሪኑ ላይ ቀና አለ። ወጣቱ መርማሪ የምርመራው ክፍል በር ላይ ቆሞ …  ውጤቱን እየነገረው ነበር።
" ምን አልኸኝኝ?"
" ነፃ ነህ!"
እንዴት በደስታ ተስፈንጥሮ እንደተሳና፣… እንደረሰ ሳያውቅ፣ ራሱን ከቤቱ ውስጥ አገኘው።
ወገሬት!!

"ቅንነትም እርዳታ ነው"

#ሳteናw

… ቅን መሆን በራሱ እርዳታ ነው። ለዛውም የረጂውን ጥቅም ሳይነካ ተረጂውን የሚጠቅም ብሎም ህይወቱን የሚቀይር ሀይል ያለው። ለዚህ ምርጥ ምሳሌ የሚሆነው የአባላችን ጄጃንና የእንጀራ ወንድሙ ነስሪ፣የህይወት ታሪክ ነው…
⚂⚂⚂⚂⚂⚂⚂⚂⚂⚂⚂⚂⚂⚂⚂⚂⚂⚂⚂

  እንደተለመደው የመሿለኪያዋ ወጣቶች ከስራ ውሏቸው ቡሃላ ምሽቱን በመሿለኪያቸው ተሰባስበዋል። የሰሞኑ ውርጭ የፈጠረው ቅዝቃዜ በጉርድ በርሜል እንጨት ለማንደድ አስገድዷቸዋል። ይህ የአየር ንብረት( ምን የአየር ንብረት! የአየር ክስረት ነው እንጂ) … መሿለኪያን ወደ ፍሪጅነት ለውጦት፣ አባላቱን  በሞላ  ከቤቱ  ጋቢና ክንብንብ አምጥቶ ለማስለበስ ምንም አልቀረውም።  … ሙቀቱን ፍለጋ በበርሜሏ ዙሪያ … መሸጋሸጋቸው፣ አፍ ለአፍ ገጥመው ሚንሾካሸኩ የከንፈር ወዳጆች አስመስሏቸዋል። የሚንቦገቦገውን እሳት ከበው ሁሉም በርጫ እየበረጩ ነው፣ አጫሹም ፋታ እየሰጠ ያጨሳል። አንድ የጋራ መወያያ ርዕስ ካልተነሳ … አንዱ ከአንዱ ጋር መወያየት የተለመደ ነው። ቡፌት ስለ ሰሞኑ የአየር ፀባይ፣ ሳተናው: ከጄጃን ጋር፣ ሌላው ስለሌላ የተለያዩ አጀንዳዎች ወሬው ጥንድ ጥንድ ሆኖ አፍክቶቷል።

  እኔ ምለው ሲል ጀመረ ቡፌት" እኔ ምለው የሰሞኑ አየር ፀባይ!!…  ቆይ ምንሼነው? አለ አይደል፣ መላ ቅጡ እንደጠፋ፣ ይህ ነው ለማለት የቸገረ አይነት ሆነ እኮ። ፀሀዩ እንደ ክፉ ሰው ምላስ አቃጠለኝ ብለህ ጥላህን ስትይዝ…  ቀዝቃዛነት ያዘለ ንፋስ… ወላ ውርጭ በለው!! ወዛም የነበርከውን ሰው በአንዴ እንደ ሽሮ እቃ  አመዳም አድርጎ ቁጭ ይላል። በተለይ በሌሊት ምትነሳ ከሆነ…  አይጣል ነው። እንደውም መቼ ለት እንደ ልማዴ በሌሊት ስነሳ፣ ለወትሮው የሚቀበለኝ የወፎች ድምፅ ደብዛው ጠፍቶ ሳይለንት ላይ አክቲቬት ሆኗል። እንዴት ነው ነገሩ ብዬ የመኝታ ክፍሌን መስኮት ገልጬ አዕዋፋቱን ስሾፈትርልህ፣ አዕዋፋቱ ብርዱ ከአቅማቸው በላይ ሆኖ መንቁራቸውን እያንቀጫቀጩ …  ቫይብሬት ላይ ሆነዋል።" የአባላት ሳቅ አጀበው። ሳተናው ሀሳቡን ከሳበው የቡፌት ቀልድ፣ ከጄጃን  ጋር ወደ ጀመረው ጨዋታ ዞረ።

"ቆይ ይኸውልህ ጄጃን! ስለ አንተና ወንድምህ ነስሪ ከስር መሰረቱ አስረዳኝ እስኪ?"

"አለ አይደል እንዴት ላስረዳህ! አለ በዝምተኛነቱ የሚታወቀው ጄጃን።
የቤተሰባችንን ሁኔታ በቀላሉ ለማስረዳት ከባድና፣ ውስብስብ በመሆኑ ያስቸግራል። አለ አይደል ጊዜና ጆሮ ሰጥተህ ካደመጥከኝ ልነግርህ ፍቃደኛ ነኝ አለ።"

"እባክህ ዝም ብለህ ንገረኝ!"ሲል ሳተናው ፣ ሁሉም አባል ጆሮውን ለጄጃን ሰጠ።

" የእናቴ እናት፣ ከእናቴ አባት ጋር ባለመስማማት ከተፋታች ቡሃላ፣ እንደሷ አግብቶ የፈታ ሰው አገኘችና ከተማ ውስጥ ትዳር መሰረቱ። ይህ ባሏ ከቀድሞ ሚስቱ የወለዳቸው ልጆች ነበሩትና፣ እነሱን በእንክብካቤ ታሳድግ ጀመር። ልጇ ማለትም እናቴ ኑሮዋ ገጠር ነበር። አያቴ ና ባለቤቷ ፍቅር ነበራቸው። አያቴ የባሏን ልጆች በእንክብካቤ ስታሳድግ፣ የአብራኳን ክፋይ እናቴ  ግን ገጠር ኖረች። አያቴና ባሏ በዚህ ትዳራቸው ንብረት አፈሩ። በአንፃሩ እናቴም ተድራ ልጆች ወለደች። ከእነሱም ውስጥ እኔ በከተማው አያቴ ቤት ማደግ ጀመርኩ። ከአያቴ ባለቤት ልጆች ጋር እንደ ወንድምና እህት በሆነ ስሜት። ሞት የተባለው የተፈጥሮ ህግ ከአያቴ ባለቤት፣ ጀመረ፣ ቀጠለ የሱን ልጆች አንዱ ነስሪ እስኪቀር ወደ ማይቀረው አለም ሄዱ(መቼም መልካም ሰዎች አይበረክቱም)፣ በመጨረሻም፣አያቴን ወሰደ።  በወቅቱ እኔ የአሰራሥድስት አመት ልጅ ነበርሁ። የአያቴ የእንጀራ ልጅ ነስሪ ደግሞ ትዳር መስርቶ ኑሮው በሌላ ስፍራ ነበር። አያቴ ስትሞት በጊዜው በቤቱ እኔ ብቻ ቀረው። የህይወቴ ሁለተኛም ምዕራፍ ከዚህ ጀመረ። አያቴ ከሞተች ቡሃላ በመርካቶው ቤት እኔ ብቻ መኖሬን የታዘበ ጎረቤት ቀበሌ ሄዶ<<ለጄጃን ተመጣጣኝ ቤት ይሰጠው ይሄን ለኔ ስጡኝ>> ሲል አመለከተ። ቀበሌ ከሚሰራ ሰው ጥቆማው የደረሰው ነስሪ ጓዙን ጠቅልሎ መርካቶ ቤት ገብቶ አብረን መኖር ጀመርን። ከዛ ቡሃላ ወንድሜ ነስሪ ለኔ ሁለት አይነት ሰው ሆነ። ከህፃንነት እስከ ጉርምስናዬ ያለው ነስሪና ከዛ ቡሃላ ያለው ነስሪ ። በጨቅላነት ዘመኔ ማንም ታላቅ ለታናሹ እንደሚሳሳው የሚሳሳልኝ የሚያዝንልኝ የሚንከባከበኝ ሲሆን። ከአያቴ ህልፈት ቡሓላ ማለትም ከሱ ጋር መኖር ከጀመርኩበት ማግስት ሌላ የማላውቀው ነስሪ ሆነብኝ። እንደ ልጅነቴ የነስሪን ፍቅር አጣው። በፊት የሚጫወት የሚያቃልደኝ የሚመክረኝ ነስሪ ባላወኩት ምክኒያት መሰረታዊ ፍላጎቶቼ በርሱ እጅ በሆነ በጥቂት ጊዜ  ውስጥ በበነነ ተነነው የሚቆጣ ቁጥጥር የሚያበዛ … የሚነጫነጭ ሆነ።

  ነስሪ በልጅነቴ አይቆጣኝም ነበር ማለቴ አይደለም። ይቆጣኛል። በልጅነቴ  ቁጣው ውስጥ የወንድማዊነት፣ የአዘኔታ፣ እና ለራሴው ጥቅም የሆነ መንፈስ ይታየኝ ነበረ። ከአያቴ ሞትና ከጉርምስናዬ ቡሃላ ግን ነስሪ ሳጠፋ የሚቆጣኝ ቁጣ አስጠንቃቂና አስፈራሪ፣ አስበርጋጊ እየሆኑ መጡ። <<የምትኖር ከሆነ ስርዓትህን ይዘህ ኑር!>> የሚል።  ሰሞኑን ከፍቶት ነው ብዬ ምክኒያት በራሴ ሰጠሁት። አስፈራሪና አስጠንቃቂው ቁጣ ተደጋገመ ነገሩ ባሳለፍነው ህይወት ተከስቶ የማያውቅ ስለነበር በጣም ግር አለኝ። ለሱ ግን የታወቀው አይመስለኝም። የዛን ሰሞን የቀበሌ መታወቂያ ፈርመህ አውጣልኝ አልኩት።"ምን ሊያደርግልህ ነው?" ብሎ ከጠበኩት በላይ ተቆጣ ግራ ገባኝ! ቁጣው የቤቱን ስም በኔ አዙርልኝ ያልኩት እስኪመስለኝ ድረስ በረታ። መታወቂያ ካርድ ምን ሊያደርግልህ ነው ይባላል እንዴ? ወቅቱ የ97 ምርጫ ካርድ የሚታደልበት ስለነበር ካርድ ለማውጣት ስል ብቻ ቁጣውን ተቋቋምኩት። በዚሁ ስሜት ቀበሌ ሄዶ ፈረመልኝና የመታወቂያ ካርድ ተቀበልኩ። ምን ሊያደርግልህ ነው ብሎ የተቆጣኝ ግን ብዙ ነገር እንድፈላፈል አደረገኝ። የድሮው ነስሪ ናፈቀኝ። ጭራሽ ግራ ቢገባኝ ነስሪ እንዲህ የተለወጠብኝ በምን ይሆን? ስል ግልፅ መልስ ያጣሁበት መብሰልሰል ላይ ጣለኝ።

  ከዛም ቡሃላ አንድ ነገር ሳጠፋ የነስሪ ቁጣ <<የምትኖር ከሆነ ስርዓትህን ይዘህ ኑር!>> የሚል ቃላት የበዛበት ሆነ። በዚህ ቁጣ ውስጥ አርፈህ መኖር ማትችል ከሆነ ቤቱን ለቀህ ውጣ የሚል ትርጉም እንደሚሰጠኝ ማስታወስ አይጠበቅብኝም። በወቅቱ ተማሪ ነኝ… ከነስሪ ጋር በመኖር ሂደት ውስጥ ስንኖር ከዛሬ ነገ ያባርረኛል የሚል ስጋት ያድርብኝ ጀመር። ይህ የስነልቦና ጫና እየቦረቅኩ እየዘለልኩ ባደኩበት ቤት ውስጥ  በነፃነት የመንቀሳቀስ ሞራሌን አጠፋው። እራሴን እንደባዳና ነገ እንደራሴ ቤት ያለ ስጋት አብረን ስለመኖራችን ዋስትና የሌለኝ አድርጌ ወሰድኩ። ምሽት ላይ ድሮ ሶፋው ላይ እየተንከባለልኩ ቪዲዮ ሙዚቃ እየመረጥኩ የማሳልፍ ልጅ ሳሎን በር ላይ ባለ ነጭ የኘላስቲክ ወንበር ላይ እስክንተኛ መቀመጥ አዘወተርኩ። ቤቴ ነው የሚለው እምነት ከህሊናዬ ደበዘዘ። ከዛሬ ነገ ይለወጣል ያልኩት ይህ የነስሪ የባህሪ ለውጥ መሻሻል ሳያሳይ ቀረ። በዚህ ሁኔታ አብሮ ማሳለፋችን ለተለያዩ ጭቅጭቆችና ንዝንዞች ሲያጋልጠኝ በተቻለኝ መጠን ከቤት መራቅ ጀመርኩ። ውጪ ውጪ አልኩ። አያቴ በህይወት እያለች የነበረን ፍቅር ናፈቀኝ። ትዝ ሲለኝ ያስለቅሰኝ ያስተክዘኝ ጀመር። ነስሪ በተደጋጋሚ የሚቆጣኝ አስጠንቃቂ ቁጣ እራሴን ከቤት እንዳገል አስገደደኝ። የቤተሰብ አባል አይደለህም የሚል መልዕክት አስተላለፈልኝ። እንደዛ ሳደርግ ነስሪም ለምን ብሎ ሳይጠይቀኝ ቀረ። በቃ ይህንን ነው የፈለገው ብዬ ውጪ ውጪ ማለቴን አበዛው… ከአይሆኑ ጓደኞች ገጥሜ ለተለያዩ ሱሶች ተጋለጥኩ። ከምቹ ሶፋ ወደ ደረቅ ወንበር ስሸጋገር ለምን ብሎ ያልጠየቀኝ ነስሪ በዚህ ድርጊቴ ተቆጣኝ። ቢቆጣኝም የቁጣው መንፈስ እንደ ልጅነቴው ዘመን በወንድማዊነት በአዘኔታዊ መንፈስ ስላልነበር ቁጣው ከልቤ ጠልቆ መዝለቅ አልቻለም። በዚህ ሂደት ነስሪ ስራ ለመጀመር የተወሰነ ብር ሰጥቶኝ ነበር። ዛሬ እንድሰራበት ከሰጠኝ ብር ግን በልጅነት ዘመኔ በወንድማዊ ስሜት የገዛልኝ መፅሀፍት ይበልጡብኛል። የባዳነት ፊት አሳይቶ ከሚሰጥ ሺህ ብር በወንድማዊነት መንፈስ የተሰጠ አስር ብር በስንት ጠአሙ። ያ እንድሰራበት የተሰጠኝ ብር ከዚህ ቀደም ከቤት ስሸሽ ባዳበርኩት ሱስ ምክኒያት ወደመ። በተደጋጋሚ የስራ መስኮችን ብሳተፍም እድገት ማምጣት አልቻልኩም። ከነስሪ ጋር ብንኖርም በልጅነት ዘመኔ የነበረው በወንድማዊ መንፈስ የመተያየትና የመተሳሰብ ስሜት ከአያቴ ጋር ላይመለስ ሄደ። ነስሪ አውቆም ይሁን ሳያውቅ ያሳደረብኝ ተፅእኖ ለዛሬው ለሞራል አልባው ስብዕናዬ መሰረት ሆኗል። ዛሬ ልወቅሰው አልፈልግም ነገር ግን ምክኒይቱ ይህ ነው። ዛሬ ዛሬ ሳስበው የወንድማዊነት ስሜታችንን ያላላው መኖሪያ ቤታችን በመርካቶ ዙሪያ በመሆኑና ለወደፊት ህይወት ጠቃሚ ይዞታ ስለሆነ ይመስለኛል። ታዲያ ይሁና! ከኔ ጋር ምን ያገናኘዋል። የወራሽነት መብቱ ቢኖረኝምኝ! ፍላጎቱም የለኝ! ታዲያ የሚያገለኝንና ለህሊናዬ የማይፋቅ በቁጣ የተሸፈነ የምላስ ቢላ ለምን ተሳለብኝ እኮ ለምን? መልስ ያጣሁለት ነገር ነበር።

ነስሪ ቤት ውስጥ የራሴ አንድ ክፍል ነበረኝ። ማታ ገባለው  ጠዋት እወጣለው። ብቸኝነቱ ሲበዛብኝ አንዳንዴ ዘመድ ቤት አድራለው።  በመልሶ ግንባታ ምክኒያት ክፍሌ ፈረሰች። ግንባታው እሲኪያልቅ በመርካቶው ንግድ ቤት ለመሆን ሀሳብ ለነስሪ አቅርቤ ነበር። ነስሪ እንደማይሆንና እዛው አንድ ክፍል ውስጥ አንድ ላይ ማደር እንዳለብን አሳወቀኝ… ክፉ ጎኔን ብቻ እያነሳ ኮነነኝ።

…ይህ አባባሉ ውስጥም የታየኝ…  ሸር ያሰብኩበት መስሎት እንደከለከለኝ … ነው። ደግሞ በባልና በሚስት ክፍል አንድ ላይ እንደር ማለት ውጣ ከማለት በምን ይተናነሳል?። የነስሪ የልቡን አላህ ነው የሚያውቀው። ለኔ ደህንነት ቢሆን ይሄን ጥያቄ ሳላነሳ በፊት ወንድማዊ ምክሩን በቸረኝ ነበር። ከነነስሪ ጋር በአንድ ክፍል ማደሩ ከበደኝ… ምክኒያቱስ …  ይሄ ስሜት ከአሳዳጊ አያቴ ሞት ቡሃላ ለረጅም አመት በህይወቴ ያለተከሰተ ጉዳይ ነው። ከአያቴ ሞት ቡሃላ የነስሪ አውቆም ይሁን ሳያውቀው ያሳየኝ የባህሪ ለውጥ ነው። ከአያቴ ሞት ቡሃላ በቤቱ ውስጥ አራሴን ሳገል ዝም መባሌ ነው። ከአያቴ ሞት ቡሃላ ጨው ለራስህ ስትል ጣፍጥ… አይነት አስጠንቃቂ ቀጣ ነው። ምን ላድርግ ወድጄ አይደለም!  ነስሪ ይቆጣኝ የነበረው አሰጠንቃቂ ቁጣ ህሊናዬ ላይ ከባድ ህመምና ጠባሳ አትሞብኛል። ነስሪ አውቆም ይሁን ሳያው የሚያደርጋቸው ነገሮች፣ እኔን የባዳነት ስሜት እንዲሰማኝ የሚያደርጉ ነበሩ። በአንፃሩ እናቴም ከገጠር ወደ ከተማ ጠቅልላ ኑሮዋ በከተማ ሆኖ ነበር።  እኔና ነስሪ የምንኖርበት ቤት በግንባታ ሰበብ ስለጠበበ እኔ ከእናቴ ጋር ለመኖር ተገደድኩ። ገና አያቴ እንደሞተች እናቴ መርካቶ ያለው የንግድ ቤት የእናቴ ድርሻ ሊሰጠኝ ይገባል የሚል ጥያቄ ለማንሳት ስትሞክር እኔ ነኝ፣ እባክሽን ቤተሰባዊነቱ ይሻለናል፣ ለአለማዊ ጥቅም ስንል፣ አንቆራረጥ ብዬ ያስቆምኳት። ዛሬ ይኸው በቤተሰቦቻችን ንብረት የሚጠቀምበት ነስሪና ሌላ ሶስተኛ ወገን ሆነ፣ እኔና እናቴም በነስሪ ወደ ጎን ተደርገን የችግር ኑሮ እንመራለን " አለና ጄጃን ንግግሩን ቋጭቶ ወደ ዝምተኛነቱ ባህሪው  ተመለሰ። በታሪኩ ሁሉም የመሿለኪያ አባላት ተመስጠው፣ በጥሞና ነበር ያዳምጡ የነበረው። በዛ ላይ ጄጃንንም ነስሪንም በቅርበት ያውቋቸዋል።

"ጄጃን ልክ አላደረክም፣ እናትህ ድርሿዋን ልታስከብር ይገባ ነበር።" አለው ቡፊት ዛሬ ጄጃንና እናቱ የኑሮዋቸውን ሁኔታ እያሰላሰለ።"

"እንደ እውነቱ ከሆነ፣ ጄጃንም ሆነ እናቱ ይህን ከማሰባቸው በፊት፣ ነስሪ ፍትሃዊ ክፍፍል ማድረግ ይገባው ነበር። ልብ በሉ!! ቤቱ በጣም ሰፊ እንደሆነ ታውቃላችሁ። ነስሪ ቅን ቢሆን ኖሮ የራሱ ጥቅም ሳይነካ እነሱንም መጥቀም ይችል ነበር። ግን ቅንነት ይጎድለዋል። አስቡት ቅን ቢሆን ኖሮ እኮ ወደፊት ለሚደረገው የመልሶ ማልማት ግንባታ እራሱ፣ ነስሪም የጄጃን እናትም የአክሲዮን ባለቤት መሆን ይችሉ ነበር። ሁለቱም ስለ ገንዘብ ሳያስቡ መኖር ሲችሉ፣ ምን እነሱ ብቻ። ሌላም ባለድርሻ ቤተሰብ ቢኖር በቂ ነበር። ምን ያደርጋል በነስሪ ቅንነት መጉደል ምክኒያት ይህ ሁሉ ሊበላሽ ችሏል።" አለ ሰያ ነጭ ሽንኩርት በቁጭት ስሜት።

ግድ የለሹ ሙልጌ ቀጠለ… "ምንም! የተበላሸ ነገር የለም። አሁንም ቢሆን የተበላሸውን ማስተካከል ይቻላል። በገዛ ንብረታችሁ የበይ ተመልካች ልትሆኑ አይገባም። ትሰማለህ ጄጃን የወንድማዊነት ይሉኝታ ምናምን ምትለውን ቡቱቶ አውልቅና ጣል። እሱ ይህ ስሜት ቢኖረው ዛሬ ስትቸገሩ እያየ ዝም አይልም ነበር። አሁንም ቢሆን ቤቱ ሰፊ ነው፣ ለሁላችሁም ይበቃል። ፍትህ ልታገኙ ይገባል። መጀመሪያ በሽምግልና ካልሆነ በህግም ቢሆን ሄደህ፣ መብታችሁን ማስከበር አለብህ።  ፍትሃዊ ክፍፍል እስኪደረግ ድረስ፣ መራመድ ይጠበቅብሃል። ለዚህ ደግሞ እኛ የመሿለኪያ አባላት ከጎንህ ነን አይደል እንዴ? ሲል የስብስቡን አባላት እየዞረ ቃኘ። ሁሉም ልክ ነው!! በሚል ራሳቸውን በአዎንታ ነቀነቁ።

"ይገርማል!!ብሎ ጀመረ … ሳተናው፣ የሚነድ እንጨት ወደ ጉርዷ በርሜል እየጨመረ። … ይገርማል!!
ቅን መሆን በራሱ እርዳታ ነው። ለዛውም የረጂውን ጥቅም ሳይነካ ተረጂውን የሚጠቅም ብሎም ህይወቱን የሚቀይር ሀይል ያለው። ለዚህ ምርጥ ምሳሌ የሚሆነው የአባላችን ጄጃንና የእንጀራ ወንድሙ ነስሪ፣የህይወት ታሪክ ነው። ሰውን ለመርዳት ሰው መሆን ብቻ በቂ ነው የሚለው አባባል እውነትነቱ የጎላብኝ አሁን ነው። ለምን ቢባል ሰው መርዳት በገንዘብ ብቻ ሳይሆን በሃሳብም በቅናዊነትም። ስለዚህ ሰውን መርዳት ቀላልና፣ የሚያፀድቅ በጎ ተግባር ነው። ረጂ ለመሆን ከገንዘብና ሀሳብ በተጨማሪ ቅንነትም ያስችላል። ይህ ቅንነት በሀገራችን ቢስፋፋ፣ ፍትሃዊ ክፍፍል ቢነግስ ዛሬ የሚኖረንን ለውጥ፣ እስኪ በጄጃን ታሪክ መስላችሁ አስቡት እስኪ" ብሎ ፍልስፍናውን ቋጨ።

ጄጃን ለሙልጌ ሀሳብ እሺም እምቢም፣ የሚል ምላሽ አልሰጠም። የመሿለኪያ አባላት ወንድሞቹ የሚሰጡትን አስተያየት፣ በጥሞና አዳምጧል፣ የተናገሩትንም አንደሚተገብሩት ጠንቅቆ ያውቃል። ግን ምንም ሳይል ወደ ዝምተኛነቱ ባህር ጠለቀ።
ወገሬት!!

"ምን አገባኝ እስኪ…!!"

#ሳteናw

… ሴት ልጅ በተፈጥሮዋ መደመጥ ትፈልጋለች፣ ለሚያዳምጣት ወንድ የትለየ ክብርና ፍቅር ትቸራለች። ራሷንና  ጓደኞቿን የሚያከብርላትን፣ የሚያምናትን ወንድ ቅድሚያ ትሰጠዋለች፣ ፍቅር ትሰጠዋለች ቪዋን ትጀብተዋለች፣ ይህንን ለማወቅ ሳይካትሪስት መሆን አይጠበቅብህም!! በርካታ የፍቅር ሰይኮሎጂ …
⚂⚂⚂⚂⚂⚂⚂⚂⚂⚂⚂⚂⚂⚂

   ሁልጊዜ አንድ አይነት ከሆነው ውሎዬ ቡሃላ ወደቤት ለመሄድ፣ ታክሲ ውስጥ ተቀምጫለው። በመስኮቱ አሻግሬ አላፊ አግዳሚውን ቃኛለው። የጎዳላው ላይ ውክቢያ፣ ጩኸት የተለያዩ ነገሮች ትርምስ ህብረ ወከባ ይታይበታል። ወያላው ይጮሃል፣ የመኪና ው ሞተር፣ ይጮኻል፣ ውሻ ይጮሓል፣ ከየኤሌክትሮኒክስ ሱቆች የሚለቀቀው ሙዚቃ ይጮኻል። ህብረ ጫጫታው … አለ አይደል… የድምፆች አብስትራክት ሆኖ አንዱን ከሌላው ለመለየት የተለየ ትኩረት የሚጠይቅ አይነት ነገር…  የአካባቢው ምሽቱ ድባብ። ከዚህ ሁሉ ውክቢያ መሃል፣ የትኛውንም ወንድ የሚያማልል፣ … እንደ አሎሎ ማጅራቴ ላይ ለጥፌ በተሽከረከርኩ፣ የሚያሰኝ… አለ አይደል! በዘመኑ ቋንቋ የሚያሻ*ድ ግት ያሏት ቀበሮ (ልጅ) ድንገት አየው። በአይኔ ተከተልኳት።  የግቷን ባለቤት ቀናም ብዬ ፊቷን አየው ፣ እንደ ግቷ ባይሆንም ለክፋ የሚሰጥ አልነበረም። የጠይም ቆንጆ በዛ ላይ ልጅ እግር፣ የልጅነት ወዘናዋ በተክለ ቁመናዋ ላይ፣ የበለጠ ሳቢ እንድትሆን የራሱን ሚና ተጫውታል። አይኔ መላ ገፅታዋን ሲቀርፅ አይምሮዬ ውበታቷን አንድ በአንድ እየበታተነ በሰንጠረዥ ይሄ ከዚህ ፣ ያ ከዛ ይበልጣል እያለ የራሱን የንፅፅር መስመር ይሰራል። ልጅት ከአንድ ጎረምሳ ጋር ተገናኘች። ቆማ  ታወራው ጀመር። ቀርቤ የሚያወሩትን ባልሰማም፣ ሰላማዊ ያልሆነ ንግግር እንደያዙ ከእንቅስቃሴያቸው ተረዳው። እጁን እያወናጨፈ ያወራል። ምን ይሆን የሚያጨቃጭቃቸው? ቀርቤ ብሰማቸው በወደድኩ። እሱ ያወራል። መልስ ስትሰጠው ድምፁን እያጎላ ፍጥነቱን እየጨመረ እሱን ብቻ እንድትሰማው ያደርጋል።  ምላሿን አልሰማ ሲል… ዝም ብላ ሁለት እጆቻቿን የሚያማምሩ ግቶቿን አቅፋ (በመምህራን ቋንቋ እጇን በደረት አድርጋው) ግድ የለሽ በሆነ ልብ ትሰማው ጀመር። ጀለሴ ዝም ስትለው፣  ከልቧ የምታዳምጠው መስሎት… በሌላ ሞራል  እትትትትትትውን አቀለጠው፣ ደጋግማ ሰዓቷን አየች። አልገባውም እንጂ አረ ተፋታኝ በቃ!! እያለችው ነበር።  መጨረሻቸውን ለማወቅ ጓጓው።
ተሰናብታው እኔ ያለሁበት ታክሲ በር ላይ ልግባ አልግባ ስትል አመንትታ በመጨረሻም ገባችና ከፊቴ ካለው ወንበር ዘፍ ብላ ተቀመጠች። ስትቀመጥ ወንበሩን የኋሊት አንገራገጨችው፣ እንደ ግቷ ፍዴዋም ግብዳ ይሆን እንዴ? …ከመቀመጧ በረጅሙ ተነፈሰች። ምን ያህል ቢያቃጥላት ነው? እዛው ቆሟል እንድታየው ያያታል። … አለ አይደል እንደ መሳጭ ፍቅረኛ፣ እጇን እያውለበለበች… መዳፏን ስማ በሃሳባዊ ትዕይንት የከንፈሯን ቅርፅ እንደ ቢራቢሮ በትንፋሿ ገፍታ እንድትልክለት!! ምናምን ጠብቋል…

…  እሷ፣ ለአፍታ እንኳ ዞራ አላየችውም። ታክሲው እስኪንቀሳቀስ ልጁ በተስፋ እየጠበቀ አልተንቀሳቀሰም ነበር። እንደጨከነችበት ሲያውቅ ፊቱ ላይ የእልክ ስሜት ይነበብ ጀመር። ታክሲው ተንቀሳቀሰ። እኔንም እሷንም፣ ወያላውን፣ ሹፌሩን ተሳፋሪዎችን ጠቅልሎ የዋጠውን የታክሲዋ ሆድ፣ ከመንገድ መብራቱ ብርሃን… ተንቀሳቅሶ ለአፍታ ጨለማ ሲውጠው፣ እንዳየችው እንዳያያት ዞራ አየችው። አብሬያት ዞርኩ። ጀለስካ መሄድ ጀምሯል። ታክሲው ከቆመበት ጠርዝ ወደ ዋናው መንገድ ገብቶ ፍጥነት ሲጨምር … ተደላድላ ተቀመጠች። ከልጁ ስትርቅ ምቾቷ ይሰማታል ማለት ነው?። አንዳች ነገር አልጎመጎመችና፣ ሞባይሏን አውጥታ የተደዋወለችውን ቁጥሮች መሰረዝ ጀመረች። ይህ ድርጊቷ የልጁን የቁጥጥር ወሰን… ፣ ወይም አንድ ያለ ፍቃዷ ስልኳን የሚጎረጉርና ጫና የሚፈጥርባት ሰው መኖሩን አመላካች ይመስላል። ስልኳ እየነካካችው ሳለ ድንገት ጠራ። በንዴት ልትወረውረው ቃጣት። ልጁ መሆኑ ገባኝ። አነሳችው…  ሀሎ… ያልጨረሰውን ሃሳብ በስልኩ ይተገትግባት ገባ። እሺ እሺ እያለች መልስ ትሰጣለች። በመሃል "እንዴት የራሷ ጉዳይ ሴት ልጅ እኮ ነች!" የሚል ምላሽ ሰጠችው።" መጥፎ መልስ ሰጣት መሰለኝ፣ ምላሽ ነስታው ዝም ብላ መስማት ቀጠለች። "እየሰማውህ ነው ቀጥል።  ይሄ ከንቱ፣ ዝም ብሎ መለፍለፍ አይሰለቸውም እንዴ?  ለሷ እኔ ጨነቀኝ። አሳዘነችኝ። መውረጃዋ ደርሶ ከታክሲው  ስትወርድ፣ እንደቅድሙ በፍትወታዊ ሽ*ደት፣ ሳይሆን በወንድማዊ እዝነት፣ እያየው ሸኘኋት።

  … ሁኔታዋ ግን እኔው ጋር ቀረ። ጠቅለል ባለ መልኩ ስረዳት። ልጅት ልጁን ትወደዋለች፣ ታምነዋለች። በተቃራኒው እሱ ይወዳታል፣ ነገር ግን አያምናትም፣ ከአይኑ በራቀች ቁጥር፣ ወደ ሌላ የምትሄድበት ይመስለዋል። ከሚያውቀውና ከሚጠረጥረው ሰው ጋር እንደመጠርጠር…  አለ አይደል፣ ክላስ ይዘው ከንፈር ለከንፈር ስትሳሳም፣ መርፌና ክር ስትሆን፣ ያ ፋራ እያለች፣ ስታማው፣ስትሳሳቅ ምናምን አይነ ህሊናው የራሱን ጥርጣሬውንና በገሃድ ያያቸውን ትዕይንቶች እንደ አኬልዳማ፣ ጂሃዳዊ… ምናምን …  አቀናብሮ የሚያስከልመው ይመስለኛል። በዚህም ይመስላል እልክ ተያይዟታል፣ እንድን ነገር የሚያሳምናትውይይት ሳይሆን በጩኸት እንደሆነ፣ በአይኔ በብረቱ ያረጋገጥኩትነገር ነው። በዛ ላይ የራሱን ጎን እንጂ የሳን ጎን የመስማት አባዜ አይታይበትም።

  ሴት ልጅ በተፈጥሮዋ መደመጥ ትፈልጋለች፣ ለሚያዳምጣት ወንድ የትለየ ክብርና ፍቅር ትቸራለች። ራሷንና  ጓደኞቿን የሚያከብርላትን፣ የሚያምናትን ወንድ ቅድሚያ ትሰጠዋለች፣ ፍቅር ትሰጠዋለች ቪዋን ትጀብተዋለች፣ ይህንን ለማወቅ ሳይካትሪስት መሆን አይጠበቅብህም!! የፍቅር ሰይኮሎጂ መፅሀፍትን ገለጥ ገለጥለጥ ማድረግ በቂ ነው… እናም ሄዋኖች ከአዳሞች የሚሹትን ነገር፣ ይህ ልጅ አልተገበረም። አያምናትም፣ አያዳምጣትም፣ለጓደኞቿም ሆነ ለሷ አክብሮት የለውም። እነዚህ ሁኔታዎችን ካላስተካከለ በአጭር ግዜ ውስጥ ፍቅራቸው አደጋ ላይ …

እንዴዴዴዴ …ቆይ… ቆይ… ቆይ… የኔ ጥብቅናና በማያገባኝ መፈተል አልገረመህም?ምን አገባኝ እስኪ?
ወገሬት!!