"ምክርና ቡጢ"

"ም ክ ር ና  …   ቡ ጢ "
#ሳteናw

  ምክርና ቡጢ ለሰጪው ቀላል ነው" ይባላል።  ልክ ነው! ሁለቱም የሚከብዱት ለተቀባይ እንጂ ለሰጪው አይደለም። ግን በሰላም አገር ለምን ስለ ቡጢ? ባይሆን ስለ ምክር ጠቀሜታነትና ጉዳት እንዳስስ። ደግሞ ምክር ምን ጉዳት አለው? የሚል ጥያቄ ከመድረኩ ከተነሳ። ለመጥፎ ነገር መመከርና ያለ ቦታና ጊዜው የተሰጠ መልካም የምትለው ምክር እንደ ቡጢው አካልን ባይጎዳ ስነልቦና የሚጎዳበት አጋጣሚ አለ። እንዴት ለሚለው ጥያቄ መልሱን ወረድ ስትል ታገኘዋለህ። የሂፖቶምንስትሮስስኩፔዳሊኦ ፎቢያ ተጠቂ ከሆንክ ግን እዚህ ጋር ወራጅ ብለህ ልትወርድ ዲሞክራሲያዊው መብትህ ነው። ሂፖቶምንስትሮስስኩፔዳሊኦ ፎቢያ ምን እንደሆነ ባነንክ? (ረጅም ፅሁፍ የማንበብ ፎቢያ) ተጠቂ ማለት ነው። የስያሜው ርዝመት እራሱ የተገለፀውን ፎቢያ አላመጣብህም?  ካላመጣብህ የፎቢያው ተጠቂ ስላልሆንክ … አብረን እንዝለቅ…

   ☞ ምክር በእጅህ ሳይሆን በምላስህ የምትሰጠው መልካም ነገር ነው። ኪስህ ሳትገባ በንግግር ምታበረክተው ገፀ በረከት! በለው። ምክር ኪስ ሳትገባ ብታበረክተውም በዘመናችን ኪስ የሚሞላ ስራ ሆኗል። በከተማህ ጎዳናዎች ውር ውር ስትል አከሌ አከሌ የአማካሪ ባለሞያ የሚሉ ፖስተሮችን ሳታነብ የቀረህ አይመስለኝም። ታዲያ በመንደርህ እንደሚመክርህ ማህበረሰብ በነፃ የሚመክርህ መስሎህ ዘለህ ጥልቅ ስትል ከፊት ለፊትህ "ደረሰኝ ሳይቀበሉ አይክፈሉ" የሚለው ማስታወቂያ የንግድ ድርጅት መሆኑን ይገልፅልሃል። (አስበው ለምክር ሄደህ tin numbur) ስትጠየቅ… ህእ!)።

ወደ እነዚህ አማካሪ ድርጅቶች ምክር ፈልገህ ስትሄድ። በቅድሚያ ያለብህን ችግር ትናዘዛለህ። ችግርህን ያገናዘበ መፍትሔ የሚሰጥህን ምክር ታገኛለህ።… ልክ ሳይካትሪስት ጋር … ሄደህ ምንህን እንደሚያምህ ገልፀህ ህክምናውን እንደምታገኘው) በአማካሪ ድርጅቶች ምክር ተጠቅሞ ተስፋው ያንሰራራ ህይወቱ የተለወጠ ፣ትዳሩ ከመበተን የተረፈ እንዳሚኖር ሁሉ… ያለ ቦታና ጊዜው ችግርህን ሳያገናዝብ የተሰጠ ምክር ተስፋ ያጨልማል።

   ምክር ገፀበረከት የሚሆንልህም በአስፈላጊው ቦታና ጊዜ ስታበረክተው ነው።በዛውም መጠን ለሰጪው ቀላል ቢሆንም ወደ ተግባር ለሚለውጠው ተቀባይ ሊከብድም ላይከብድም ይችላል። ምክር በምላስ ብቻ ሳይወሰን በቻሉት ልክ ለተመካሪው በተግባር ማበርከትም የምክርን መልካምነት ያልቃል። በተመክሮ ህይወት ትለወጣለች። ተስፋ ታንሰራራለች። በተቃራኒው የተመካሪን ሁኔታ ያላገነዘበ መካሪ በሚሰጠው ምክር የበለጠ ተመካሪን የሚጎዳበት፣ተስፋ የሚያዳሽቅበት፣ ሞራል የሚገድልበት ሁኔታ አለ። እንደዚህ አይነቱ ከምክርነት አልፎ ቡጢ ይሆናል። እንዴት አትልም? በምሳሌ እንይ… በገንዘብ ችግር ረሃብ የተጠበሰ ሰው ባንተ ተስፋ ጥሎ ገንዘብ ትሰጠኛለህ ብሎ በጣም በይሉኝታ እንደራበው ብቻ ነገረህ እንበል… አንተ መራቡን እንጂ ማጣቱን ሳትረዳለት ምን ገዝቶ መብላት እንዳለበት… ብታማክረው ላንተ የመከርክ ቢመስልህም ለተመካሪው ከባድ መርዶ ነው… ተስፋ የሚያስቆርጠው ነው። ለዚህም ነው ምክር በጊዜው በቦታው ልክ ነው ጠቀሜታነቱ የምልህ።

  ሌላ ምሳሌ… በገንዘብ እጥረት መክሰር  ላይ ላለ ነጋዴ ሄደህ የተዳደከመ ሱቁን አንዲሞላ ይሄን እቃ አምጣ ይሄን መደርደሪያ አሳምረው… የዕቃ አማራጮችን በካሽ እንዲገዛ መምከርም ልክ እንደዛው ምክር ሳይሆን ስላቅ ይሆናል። ምክኒያቱስ በብር እጥረት  መክሰሩን እያየህ… በካሽ እቃ ገዝተህ አምጣ በማለት ችግሩን ያላገናዘበ ምክር ሰጥተህ በቁስሉ እንጨት ሰደህ አቆሰልክው እንጂ መከርከው አይባልም።ዛሬ ይህን ሁሉ ለፈላሰፍና ልነዘንዝህ የቻልኩበት የራሴ ምክኒያት አለኝ። መዘርዘሩ አሰፈላጊ ስላልሆነ ዘልየዋለው። (መፅሀፉስ ዝለለው ይልህ የለ?)ዝለለው።ለማንኛውም በህይወታችን ሂደት ውስጥ መካሪ የምንሆንበት አጋጣሚ ተፈጥሮ የምክር ገፀ በረከት ለማበርከት ስንፈልግ… የተመካሪን  ነባራዊ ሁኔታዎችን አገናዝበን በሚገባ ተረድተንይገባል። እደግመዋለው!! የፅሁፉ ዋና አላማ ይከው ነው። ከመምከራችን በፊት የተመካሪን ሁኔታን በሚገባ ተገንዝበን መመከር አለብን ነው። አለዚያ ያለ ቦታው ምክር ለተመካሪው ቡጢ ሊሆን ይችላልና እንጠንቀቅ ነው። ካጠፋው ልጥፋ፣ ደግሞ አፉ በሉኝ!!
ወገሬት!!

"አ ጄ ክ ስ ዘ ግ ሬ ት"

"አ ጃ ኢ ቦ "
#ሳteናw

  በምን ትዝ እንዳለኝ አላውቅም ብቻ ትውስታዬን ቃላት በቃላት እየሰካካው በፅሁፍ ማስፈር ጀመርኩ። ከመንደሬ ሰልባጅ ጫማ ሻጭ ከነበረው አጃይቦ ጋር በተያያዘ ፈገግ የሚያደርግህን ስር ነቀል ቀልድ ላጫውትህ ወደድኩ…
•••••••••••••••••••••••••••••••••••••••••••
…  በተንኮለኛ ጓደኛው … የግድግዳው ሰዓት መዘውር ከጊዜው ሁለት ሰአት  ሆን ተብሎ ወደ ኋሏ ተሞልቷል። ይሄን ያላወቀው አጃኢቦ የሱሁር ሰአት ገና ሁለት ሰአት ይቀረዋል በሚል ጉንጩን እንደ የመኒ  ወጥሮ ሲቅም!። በመስኮት በኩል የንጋት ውጋገን ተመለከተ… እሪሪሪ ብሎ መጮህ ቃጣው። ሁሌም በሸር የሚጫወትበትን ጓደኛው ከድሾን እያማረረ በጉንጩ የወጠረውን ጫት ተፍቶ ወደ ስራ ወጣ…
•••••••••••••••••••••••••••••••••••••••••••
   "አጄክስ ዘ ግሬድ፣ የሃምሳ ሰው ግምት፣ የሺህ ሰዉ ዋስ"  ዘወትር እራሱን የሚያወድስባት ከአፉ የማትጠፋ ንግግር ነበረችው። የሰፈሬ ሰልባጅ ጫማ ሻጭ የነበረው አጃኢቦ ተማም። አነስተኛ ገቢ ያላቸውን ሰዎች የጫማ አቅርቦት በማቅረብ ይታወቃል። በተጨማሪም አንድ አግር ብቻ ላላቸው ወገኖች አንድ እግር ጫማም በመሸጥ ይታወቃል። ሌላው
አጄክስ ባለበት ፆታዊ ለከፋ ነበረ። አጄክስ ባለበት ጨዋታ ነበረ። አጄክስ ባለበት ጫት ነበረ። አጃይቦን ለየት የሚያደርገው ፆታዊ ለከፋው ያለ አድልኦ መፈፀሙ ነበር። በአጄክስ ለመለከፍ እድሜዋ ገፋ ያላለች ሴት መሆን በቂ ነው። ኮንጎ ትልበስ ሂልስ ሂጃብ ትጠምጥም ፀጉር ትልቀቅ ፣የቤትም፣ የመንግስትም ሰራተኛ ትሁን ብቻ እኛ ሰፈር ከመጣች ወይ ካለፈች በቃ ያለጥርጥር አጄክስ ለክፏታል። በአጄክስ ለመለከፍ ሆን ብለው በአጠገቡ የሚያልፉ እንደነበሩ ሁሉ የተደባደቡትም ነበሩ።
አጄክስ በሳቅ ፈጣሪነቱ፣ ሰው ይወደዋል ያቀርበዋል፣ ያበላዋል  ያጠጣዋል፣ ያስቅመዋል፣ይጋብዘዋል፣ አንቦ ውሃ እንደ ሻንፓይን ነቅንቆ  በላዩ ላይ ያርከፈክፉበታል፣ ይዝናኑበታል። አጄክስ በመንደሬ ሰው ይወደዳል። በተለይ ሀብታሞች። ከነዚህም ውስጥ ከድሾ ይገኝበታል። ከድሾ ከአጄክስ በጫወታ ቢበልጥ እንጂ አያንስም፣ በተለይ በተንኮል የሚያክለው አልነበረም።

   ታዲያ አንድ ቀን ጫማዎቹን ከጊቢያችን በር ላይ ዘርግቶ ይቅማል። በአዋራ ያደፉት እያነሳ ይወለውላል። ቀኑን ምንም ጫማ ስላልሸጠ ሙዱ ተጦልቧል። ካሁን አሁን ገዢ የመጣ እየመሰለው አላፊ አግዳሚውን በአይኑ ይለማመጣል ከሱ አለፍ ብሎ ከድሾ ከጓደኞቹ ጋር ይቅማሉ። ሙዱ የተጦለበውን አጄክስ ይበልጥ ለማናደድ አጋጣሚውን ሆን ብሎ ይጠብቃል። በዚህ ቅፅበት አራት የኔ ቢጤዎች(ባላ የመሰለ ዱላ የያዙ ገሪባዎች) አጃይቦን አልፈው ወደነ ከዲሾ መጡ። ምጽዋትም ጠየቁ። ከድሾ ለያንዳንዳቸው ብርና ከሚቅመው ጫት ዘግኖ ሰጣቸው። መረቁት!።አይገልፀውም። ቀጥሎ ጫማ ትፈልጋላችሁ ሲል ጠየቃቸው። አዎ ሲሉ። እዛ ጋር ከተደረደረው ጫማ የሚበቃችሁን መርጣችሁ ውሰዱ እኔ እከፍላለው  ይላቸዋል። የደግነቱ ወሰን የመጠቀባቸው እንዚህ የኔ ቢጤዎች ምርቃታቸውን ከጨረሱ ቡሃላ። ጫማ መርጠው ለመውሰድ ወደ አጃኢቦ ሄዱ። ተገጥግጠው ከተደረደሩ ጫማዎች የሚሆናቸው እያነሱ መለካት ያዙ። አጄክስ የሚገዙት መስሎት በግርምት ይመለከታቸዋል። ሁሉም የሚበቃቸው ጫማዎች ከተጫሙ ቡሃላ በቃ እሱ ነው የሚከፍለው አሉት።

"ማን?" አጄክስ በግርምት እየጠየቀ ከፋዩን በአይኑ ፈለገ።

"ይኸው እሱ!" ብለው ከድሾን ጠቁመውት መንገድ ሊጀምሩ ሲል "

"አዉልቅ እናት ል**" ብሎ ትልቅ ድንጋይ አንስቶ ሊለቅባቸው ሲል… ገሪባዎቹ በድንጋጤ የተጫሙትን ጫማ አውልቀው በባዶ እግራቸው ቀደዱት። ስፅፈው እንኳ በጣም እየሳኩ ነው።

አንድ ልጨምርና ልንካው። በሰማኒያዎቹ ውስጥ ነው በአንድ የረመዳን ምሽት ደግሞ እንዲህ ሆነ። … ከድሾ አጃይቦን ጨምሮ ከብዙ የሰፈር ልጆች ጋር በቤቱ አዳር ለመቃም ሙሉ ወጪውን ስፖንሰር በማድረግ ይዟቸው ሄደ። ሲቅሙ ሲስቁ አመሹ። አጃኢቦ ለሽንት ሲወጣ የግድግዳውን ሰዓት አውርዶ ሁለት ሰአት ቀንሶ ሞላው ይህን ከአጃኢቦ በቀር ሁሉም አውቋል። የሱሁር ሰአት ሲደርስ በተራ ተራ ሁሉም ኪችን እየሄዱ በልተውና ተጉመጥሙጠው አጠገቡ በመቀመጥ ጥርሳቸውን መፋቅ ጀመሩ። ደከመኝ በሚል ሰበብ ወደመኝታቸው ሄዱ። አጃኢቦ ሆዬ አረ ገና ነው ሁለት ሰአት ይቀረናል ቢላቸውም። ሰበብ እየሰጡት ስቀው ገብተው ገብተው ተኙ። አጄክስ በቻውን ቀረ። ሁሉም ትተውት የተነሱትን ጫት ማመንዠጉን ቀጠለ። የሱሁር ሰአት ገና ሁለት ሰአት ይቀረዋል በሚል አስፍቶ ሲቅም! ነበር በመስኮት በኩል የንጋቱን ውጋገን ተመለከተ። ከድሾ እንደሁሌውም እንደተጫወተበት ገባውና… ተሳድቦ ተሳድቦ ሲወጣለት ወጥቶ ሄደ። ምስኪን አጄክስ!! ዛሬ በህይወት የለም! ሊሞት አካባቢ ግን አድርጎ የማያውቀውን የአማኝ ተግባራት መፈፀም ጀምሮ ነበር። በአጭሩ መጨረሻው አምሮለት ነበር። በጉርምስና ግፊት ቀይ መስመሯን ያለፈ ቀልድ የቀለደው ከድሾንም አላህ ይቅር ይበለው!! ለአጄክስም ጀነተል ፊርደውስ ይወፍቀው ዘንድ ሁላችሁም ፀሎት በዱኣ እትዘንጉት!!
ወገሬት!!

"አ ን ዲ ት ዳ ቦ!"

"አ ን ዲ ት   ዳ ቦ!"
#ሳteናw

… ከዛፏ ጥላ ስር የተሸከመውን እቃ አውርዶ እረፍት ለማድረግ ተቀመጠ። በጣም ድካም የተሰማው ነስሩ ከወትሮው በላቀ ሁኔታ ፈጣሪውን…

"ያ አላህ አሁን አንተ እኔን አንዲት ዳቦ መረዘቅ አቅቶህ ነው በእንዲህ ያለ ከባድ ስራ የምታኖረኝ? " ሲል አማረረና ትንሽ ድካሙ ቀለል ሲልለት ከባዱን እቃ የተባለበት ለማድረስ መንገዱን ቀጠለ…
★★★★★★★★★★★★★★★★★★★★

  ነስሩ አብደላህ ይባላል። ሙስሊም ነው (የእስልምና እምነት ተከታይ) ነገር ግን በእምነቱ) ጠንከር ያለ አማኝ አይደለም። ወንደላጤ ወጣት ቢሆንም እጅግ ዝቅተኛ የገቢ መጠን ካላቸው ሰዎች ይመደባል። የእለት ጉርሱንም የሚሸፍነው ቀን ቀን ተሯሩጦ ከሚያገኘው የጉልበት ስራ ነው። ነስሩ ሁልጊዜ አላህ በሰጠው ጤንነት እና ጉልበት ከማመስገን ይልቅ ፈጣሪውን አብዝቶ ያማርራል። የጤንነት ዘውዱ ለሰው እንጂ ለራሱ ስለማይታየው ነበር ከማመስገን መቦዘኑ።

አንድ ቀን እንዲህ ሆነ። ነስሩ የእለት ጉርሱን የሚሸፍንበትን የጉልበት ስራውን በመጠባበቅ ላይ እንዳለ። ስራውይመጣና ከባድ ክብደት ያለው እቃ ከአንድ ስፍራ እንዲያደርስ ተነጋግሮ  እቃውን ተሸከሞ ከተባለበት ቦታ ለማድረስ ጉዞውን ጀመረ :: እቃው ከባድ ከመሆኑም በላይ የሚያደርስበትም ቦታ ትንሽ ራቅ ስለሚ የተወሰነ መንገድ ከተጓዘ ቡሃላ እጅግ ስለደከመው አንድ ዛፍ ጥላ ካለበት ስፍራ ላይ… እረፍት ከወሰደ ቡሃላ እቃዉን አደረሰ።

ከዚህ ቡሃላ ያለውን ገጠመኝ ነስሩ በራሱ አንደበት ይተርክልናል…

" እቃውን አድርሼ በመመለስ ላይ ሳለሁ መንገድ ላይ የተወሰኑ ጎረምሳዎች እርስ በእርስ ሲደባደቡ ደረስኩኝ:: እኔም ለመገላገል መሀከላቸው ገባሁ:: ጎረምሶቹ በከፍተኛ በንዴት ውስጥ ስለነበሩ. ለማገላገል መግባቴን ሳይገነዘቡ ለአንዱ ወገን አጋዥ አድርገው ስለቆጠሩኝ ይወቅጡኝ ገቡ እኔም በመናደድ እራሴን ለመከላከል በሚል ሰበብ ያገኘሁት ላይ ጥቃት ማድረስ ጀመርኩ። ይህ በንዲህ እንዳለ ከየት መጡ ያልተባለ የመንግሥት ታጣቂዎች ከበቡን። ሁላችንም ላይ የዱላ ውርጅብኝ አወረዱብን። አረ እኔ ምንም የማውቀው ነገር የለም ለማገላገል ነው የገባሁት" ብልም ሰሚ አላገኘሁም።  ይባስ ብሎ አንደኛው ታጣቂ "እሱም ሲሰነዘር አይቸዋለሁ " አለና መሰከረብኝ:: የመንግስት ታጣቂዎቹ ሁላችንንም እጃችንን በካቴና በመቆለፍ ይዘውን ወደ ጣቢያ ወሰዱን:: ጣቢያው እንደደረስን አንድ በአንድ ወደ ቃል መቀበያ ቢሮ እያስገቡ ቃላችንን ተቀበሉና ወደ ማረፊያ ክፍል(እስር ቤት) አስገቡን። የታሰርንበት ክፍል ቆሻሻ ከመሆኑም በላይ የሚከረፋ ሽታ የሚሸትበት ነው :ወለሉ ላይ የተነጠፉት እጅግ ስስ ፍራሾች በእድፍ ከመጥቆራቸው የተነሳ የመጀመሪያ መልካቸውን ለመለየት ይቸገራል:: በዚህ ክርፋታምና እጅግ ቆሻሻው ክፍል ለረጅም ሰአት ቆየን ምንም ምግብ ሰላልቀመስኩ እጅግ ራበኝ። በዚህ ሁኔታ ላይ እንዳለን የታሰርንበት ክፍል በር በሃይል ተገፍቶ ተከፈተ። አንድ የእስርቤቱ ዘብ ነበር በእጁ አንዳች ነገር ያለበት ተለቅ ያለ ከረጢት ይዟል። በሀይለ ቃል "እያንዳንድህ ተነስና ተሰለፍ " ሲል አምባረቀ። እኛም ለምን ተነሱ እንዳለ ባይገባንም እንደተባልነው አደረግን። እንዳለን መሰለፋችንን እንዳየ…

"የያዘውን ከረጢት በመክፈት ለአንድ ሰው የሚበቃ መጠን ያለው ዳቦ አወጣና ከሰልፉ ፊት ካለው ግለሰብ በመጀመር ለእያንዳንዳችን መስጠት ጀመረ። ለሁላችንም ዳቦውን አዳርሶ እንዳበቃ በገባበት አኳኋን ከክፍሉ በመውጣት በሩን ጠርቅሞብን ሄደ:: ሁላችንም የተሰጠንን ደረቅ ዳቦ በደረቀው አፋችን እያላመጥን ዳቦውን በላን። የታሰርንበት ቀን ቅዳሜ ስለነበር በ24 ፍርድ መቅረብ ቢኖርብንም ቀጣዩ ቀን የእረፍት ቀን በመሆኑ መቅረብ ስላልቻልን የእረፍቱን ቀንእዛው እስር ቤት አሳለፍን። ልክ በትላንትናው ሰአት ዳቦ የሚያድለን የጥበቃው አባል በሩን ከፍቶ ገባና ዳቦ ያድለን ጀመር።

በዚህ ጊዜ አንዳች ነገር ትዝ አለኝ አላህን ያመረርኩባት ቃል

" ያ አላህ አሁን አንተ እኔን አንዲት ዳቦ መረዘቅ አቅቶህ ነው በእንዲህ ያለ ከባድ ስራ የምታኖረኝ? "ያልኳት ቃል::

  ይህ ሁሉ እሱን በሰጠኝ መልካም ጤንነት  ባለማመስገኔና በማማረሬ በገዛ እጄ ያመጣሁት መከራ መሆኑ ተገለፀልኝ። ወደ ጌታዬ ተመለስኩ ያረቢ! አጥፍቻለሁ ማረኝስል ተማፀንኩ ድጋሚም አላህን ላለማማረር ለራሴ ቃል ገባሁ። በሰጠኝ ጤንነትና ጉልበት ማመስገን እንዳለብኝ በሚገባ አወኩ እሱን በመገዛትም (በኢባዳ) መጠንከር እንደሚገባኝ ራሴን አሳመንኩት። ከዚህ እስር ያውጣኝ እንጂ ከወጣው ቡሃላ በዲኔ እንደምጠነክር ላላማርረው እና በሰጠኝ ሲሳይ ላመሰግነው ለጌታዬ ቃል ገባሁ እንዲህ ካደረኩ ቡሃላ ቀለል አለኝ። በዚያን ሌሊት ነቢዩላህ ዩኑስ ከአሳ ነባሪ ሆድ ውስጥ ሳሉ ያደረጓትን ዚክር "ላ ኢላሃ ኢላ አንተ ሱብሃነከ ኢኒ ኩንቱ ሚነ ዟሊሚን " ስዘክር አደርኩ:: በማግስቱ ሰኞ ፍርድ ቤት ቀርበን የዋስ መብቴ ተጠብቆልኝ ከእስር ተፈታሁ:: አልሃምዱሊላህ. ያሳለፍኩት የእስር ቆይታዬ እጅግ ብዙ ትምህርት ሰጥቶኛል ወደ ጌታዬ እንድመለስ ሰበብ ሆኖኛል አልሃምዱሊላህ።"

☞የነስሩ ገጠመኝ እጅግ አስተማሪ ነው:: እኛም ከገጠመኙ ብዙ የምንማራቸው ነገሮች አሉ አይደል? አዎ! አለ ,በሰማነው ተምረን የምንተገብር ያድርገን!!።
ወገሬት!!

ምንጭ ሼክ ኢብራሂም ሙሐመድ አፍሪካ ቲቪ ላይ ከተናገሩት አስተማሪ ቂሳ:: ትምህርቱን በዚህ መልክ ለማስተላለፍ እንዲመች ተደርጐ ጭማሪ አገላለፅ ተጠቅሜአለው!!

" ያ ል ተ መ ለ ሰ ው …… ረ መ ዳ ን"

#ሳteናw

   … የተኛበትን የሆስፒታል አልጋ ግርጌው ላይ ተቀምጬ እግሩን አያሻሸው እንዲያወራኝ እንባ በተጋገረበት አይኔ እለማመጠው ያዝኩ። መልስ ሊሰጠኝ ቢፈልግም አልቻለም። አጠገቡ በተቀመጥኩበት አንድ  የቤተሰብ አባል ከራስጌው መጥቶ ተቀመጠ። የዚህኔ ታላቅ ወንድሜ ጎታ ሁለት ቃላት ከአንደበቱ በስንት ትግል ሲወጡለት ሰማው። "ሳራን አደራ" (ባለቤቱን ማለቱ ነው) …  ቃላቶቹን ስሰማ እንደማይተርፍ ገብቶት ተስፋ መቁረጡን አወኩ። ቀድሞውንም ዳር ዳር ሲለው የነበረው እንባዬ ተንቧቧ። ሮጬ ከክፍሉ ወጣው። በዛው በሸከከኝ ስሜት ተይዤ ወደ ቤት ተመለስኩ…
★★★★★★★★★★★★★★★★★★★★★★

ቀጥሎ የማስነብብህ በ93ና በ94 ዓ/ም አስደሳችም አሳዛኝም ገጠመኝ ያሳለፍኩትን የህይወቴ ቅንጭብ ታሪክ ነው!! የማንበብም ያለማንበብም መብትህ የተጠበቀ ነው!!

  በ93 ዓ/ም ስድስተኛ ክፍል ደረስኩ። ታላቅ እህቴ ሽቱ ዘጠነኛ ክፍል ደርሳ አዲስ ከተማ ሁለተኛ ደረጃ ት/ቤት ገባች። ትልቋ እህቴ መይሙና ከስምንት አመት የጅዳ ቆይታ ቡሃላ ለሀገሯ በቃች። የሷን መምጣት ተከትሎ ቤታችን ሽቅርቅር አለች ሶፋ፣ ብፌ ፣ ብዙ ዘመናዊ የተባሉ ቁሳቁሶች ተሟሉላት። በእህቴ ሽቱ ጋዝ ይቀባ የነበረው የቤታችን የእንጨት ወለል ሰም መቀባት ጀመረ። መቀባቱስ ባልከፋ። የሰሙ መቀባት አያቴን ለወጪ እኔን ለነፃነት ማጣት ዳረገን። ይህን መሰረት ያደረገው ከታላቅ እህቴ ሽቱ የተሰጠኝ ዛቻ ተካታዩ ሆነ። 

"ታዲያ እንደ በፊት አስሬ ገባለው ወጣለው ብትል ኩርኩሜን ታቃታለህ አይደለ? የሚያስገባህ አስገዳጅ ነገር ከተፈጠረ በርኖስ አለ በሱ ላይ እየተንሸራትክ ገብተህ ትወጣለህ።"

  ያለኝ አማራጭ አለመግባት ወይም ሰሙ የሚቀባበትን በርኖስ ረግጭና ከወለሉ አጣብቄ በሱ እየተንሸራተትኩ መንቀሳቀስ ሆነ። ግን ምን ዋጋ አለው እግሬን እያንፏቀቅኩ በመንሸራተት መሄድ አልሳካልህ አለኝ። ከአንዴም ሁለት ሶስቴ በአፍጢሜ ተደፍቼ ጥርሴን ከመትፋት ለጥቂት አመለጥኩ። አያቴም ቀድሞውኑ የወጪውም ነገር ስላልተስማማት
"ልጄን ልትገዩው ነው እንዴ?" በሚል ሰበብ ሰም ለመግዛት የመደበችውን ባጀት አቆመች። ወለላችን ወደ ጋዝ፣ እኔ ወደ ነፃነቴ ተመለስን።

  ዲያስፖራ እህቴን  መይሙናን ከኤርፖርት እኔና ታላቀወ ወንድሜ ጎታ ሆነን ተቀበልናት ከያዘችው በርካታ ሻንጣና ካርቶን ጋር ይዘን ቤት ገባን። ከዚህች ቅፅበት ቡሃላ ቤታችን ለተወሰነ ግዜ የአረብ ቤት የአረብ ቤት ሸተተች። የሚሰሩ የምግብ አይነቶች ወደ አረቡ አለም ያደሉ ሆኑ። ሽቱና መይሙና በጋራ ቤታችንን ከውጪ ከመጣው ቁሳቁስ ጋር በሁሉም ረገድ ለወጧት። የቤታችን መለወጥ በርካታ የጎረቤት ጎረምሶችን ሳበች።

   የቤተሰብ አይሱዙ ሹፌር የነበረውና  ከአንድ አመት በፊት ያገባው ወንድማችን ጎታ በሚስቱ ቤተሰቦች በተዘጋጀው መልስ ለመገኘት ወደ አዋሳ ሄድን። የመርካቶ ጓደኞቹ አንድ ሳይቀሩ ተከተሉት።የመልሱ ድግስ እራት ስለነበር ቀኑን ከሙሽሮቹ ጋር በአዋሳ ሀይቅ በመዝናኛ ቦታዎቿ ስንዞር ፍቶ ስንነሳ በጀልባ ስንሄድ አሳለፈን ወደ ድግሱ ቦታ ደስ በሚል እጀባና የመኪና ክላክስ ታጅበን ደረስን። ቆንጆ ድግስ ሆኖ አለፈ። ሁላችንም ወደ አዲስ አበባ ተመለስን። ከዚህ ቡሃላ እኛም ጎታን መልስ መጥራታችን የሚጠበቅ ስለሆነ። የመልስ ዝግጅት ተጀመረ። የመርካቶ ጊቢያችን በታሪኳ ለሁለተኛ ጊዜ ድል ያለ ሰርግ አሰተናገደች። ግቢው ሙሉ በሙሉ በዲኮር ደመቀች።የመልሱ ፕሮግራም በደመቀ ሁኔታ ተጠናቀቀ። አያቴ በመይሙና በተነደፈው  ስትራቴጂ መሰረት እቀድ ስራ አስፈፃሚነት ተይዛ  ቢዚ ሆና አሳለፈች።

ይህ በንዲህ አንዳለ የረመዳን ወር ገባ። የዚህ አመት ረመዳን ካለፉ የረመዳን ወሮች በቤተሰባችን ለየት የሚያደርገው። የእህቴ መይሙና እና የወንድሜ ጎታ ከነሚስቱ እና መላው ቤተሰብ በአንድ ማዕድ ተሰባስበን ማሳለፈችን ሆነ። ፣ ለአፍጥር የሚሰሩ ምግቦች ብስኩትና የጭማቂ መጠጦች ከዚህ ቀደም በቤትም ሆነ በጎረቤት ያልታዩ ነበሩ።  የታላቅ ወንድሞቻችን ባልንጀሮች ከአፍጥር ቡሃላ እስከ ኢሻ ድረስ በኛቤት መሰባሰብ ወዘተ…  ካለፉት የረመዳን ፆሞች ለየት ያደረጉት ሆኑ። በንደዚህ አይነት ሁኔታ የረመዳኑ ፆም ደማቅ ትውስታ ፈጥሮ ይህን መሰሉ ፆም በቤተሰቡ ላይመለስ ሄደ። ፆሙ አይደለም ያልተመለሰው። ቤተሰቡ ተሟልቶና በደማቅ ሁኔታ ማሳለፉ እንጂ። ያልተመለሰው ረመዳን ብየዋለው።

  ከተወሰኑ ጊዜያት ቡሃላ  ወንድሜ ጎታ ላይ የአቋም ለውጥ ማየት ጀመርኩ። ሰውነቱ ቀን በቀን መቀነስ፣ አብዛኛውን ጊዜ ለብቻው ማሳለፍ፣ እንደበፊት መሳቅ መጫወቱ መደብዘዝ ጀመረ። በዚህ አላቆመም መኪናዋን ኪያር እንዲነዳት አድርጎ እሱ ገቢና መቀመጥ ጀመረ።

94 ዓ/ም  ገባ። ዘጠና ሶስት ቤታችንን ደስታ በደስታ እናዳደረጋት ሁሉ። 94 የቤታችን ደስታ ላይ የሀዘን ጥላውን ያጠላበት ገባ። ወደ ሰባተኛ ክፍል መግባቴን ተከትሎ ከታች አባድር ወደ ላይ አባድር ዛወርኩ። በዚሁ አመት እህቴ ሽቱ ወደ አረብ አገር ሄደች። ቤታችን የጭርታ ፅልመት ገና በሄደች ቀን አለበሰው። በዚህ ቀን ምሽት እንዲህ ሆነ።

(ለሊት እኔና አያቴ በተኛንበት ድንገት ነቃው። ደብዛዛው ዜሮ አምፖል በርቷል። የሽቱን መኝታ ሳየው ባዶውን አገኘሁት። አንዳች ሀዘን አንጀቴቴን አላወሰው ስቅ ስቅ ብዬ ማልቀስ ጀመርኩ። ለቅሶ ዬ አያቴን ቀሰቀሰ። ያለቀስኩበት ምክኒያት ስለገባት ታባብለኝ ገባች። በማባበል ሂደቱ አልገፋችበትም አቅፋኝ ለቅሶዬን ተቀላቀለች። አልቀሰን አልቅሰን ሲደክመን እንቅልፍ ወሰደን።)

  ወንድሜ ጎታ ባላወኩት ምክኒያት ሙሉ በሙሉ ስራውን ለኪያር ሰጥቶ ቤት ተቀመጠ። ለረጅም ወር ድምፁም ጠፋብን። በመጨረሻ ሚስቱ ሳራ ደወለች። ጎታ በጣም አሞታል አለችን። ታላቄ ጨቦ ወደ አዋሳ ሄደ። በማግስቱ ጎታን ሳራን የአመት ልጁ አብዱረህማንን ይዞ ኪያር በመኪናው ይዟቸው መጣ። ደግፈው እቤት ሲያስገቡትና ቀድሞ በተዘጋጀለት ቦታ ሲያስተኙት… ጎታን ሳየው ዘይኔን ማመን አልቻልኩም። ከሰውነት ውጪ ሆኗል። መናገር አይችልም  ይህን ሳይ ወትሮውም ለእንባ ቅርብ የሆነው ትልቁ አይኔ የእንባ እንክብሎች ዘረገፉ።

   አያቴ በእንባ አላበቃችም ተነስታ እንደ ጦስ ጎታን ተሽከረከረችው "እያነባችና እኔ ጦስህ ልውጣልህ" በማለት። ይህ ድርጊቷ መላ ቤተሰቡን በእንባ አጠበው። ያችን ለሊት በለቅሶ ካነጋን ቡሃላ። አያቴ እንደወትሮዋ ዱዓ ለጎታ ለማስደረግ ቢላንቢሎ ሰርታ ወደጅ ዘመዶቿን ጠርታ ድኧ አስደርጋ ዋለች።  ማምሻውን ጨቦ ጎታን ወደ ሆስፒታል ወሰደው። ቤተ ዛታ ክፍተኛ ክሊኒክ ሳርቤት አልጋ ተያዘለት። በህመሙ ጊዜ አጠገቡ የነበረው ኪያር ከሱ ጋር አደረ። በማግስቱ እሁድ በጠዋት ተነስተን ልናየው ሄድን። ቤት አይቸው ከነበረበት ሁኔታ ግሉኮስና ኦክስጂን ከመደረጉ ውጪ ምንም ለውጥ አላየሁበትም። አሁንም ማውራት አልቻለም። ከሆስፒታል አይቼው ወጣው

  … ሳራን አደራ የሚለው የወንድሜ ጎታ ቃላቶች በጆሮዬ እያንቃጨለብኝ እቤት ስደርስ  ቤታችን የረበበው የፍራቻ ፅልመት በርትቶ ሌሊቱን አሳለፍን። በሌሊት ኪያር ደወለ። ሳራና አንድ ሰው ተያይዘው ሄዱ። ሳራ ተመልሳ ስትመጣ ወደግቢ የገባችው በለቅሶ ነበር። ምንድነው ምን ሆነ ብዬ ስጠይቃት። ደክሟል ሂድና እየው ብላ የታክሲ ሰጠችኝ። ልቤን ፍርሃት ፍርሃት እየተሰማው ጊዜ ሳላጠፋ ወደ ሳር ቤት ሄድኩ። ሆስፒታሉ ጊቢ ስደርስ ኪያር እያለቀሰ ደረስኩ። ጎታ ወደተኛበት ክፍል ብሄድም ዶክተሮቹ አላስገባ አሉኝ። በጓሮ በኩል ዞሬ በመስኮት ተንጠልጥዬ አየው። ወንድሜ ጎታ በጀርባው እንደተጋደመ አይኑ ኮርኒሱ ላይ ፍጥጥ ብላለች። በይህይወት ያለ ይመስላል። መሞቱን የተረዳሁት ግን  ነርሷ ጉልኮሱን ነቃቅላ የተንተራሰውን ትራስ አንስታ ፍራሹ ላይ ጭንቅላቱን አኑራ ፍጥጥ ብላ የቀረችው አይኑን ሽፋሽፍቱን ከድና  ከላይ የለበሰውን አንሶላ ፊቱ ድረስ ሸፍና ስታለብሰው ነበር። ከማንም በላይ የምወደው ወንድሜ ጎታ ሰርገን በደገስንለት በአመቱ ከዚህች አለም ተለየ። ወንድሜ ቃልህንስ ጠብቀን ይሆን?  አላህ ጀነተል ፊርደውስ ይወፍቅህ።
ወገሬት!!

" ር ዕ ስ አ ል ባ ው ወ ግ "

#ሳteናw  

  በህይወቴ  አስደሳችም አሳዛኝም ገጠመኞች ያሳለፍኩ ቢሆንም ቅሉ በደስታ ማግስት ስለተከሰተው አሳዛኝ ገጠመኝ ተነበበም አልተነበበ አከትበው ዘንድ መንፈሴ መራኝ…

  የመርካቶ ጎረቤቶቼ  ሴት ልጃቸውን ለመዳር ሽር ጉድ ማለት ጀመሩ። በዚህም ምክኒያት መንደሬ እጅግ ግዙፍ የሰርግ ለማስተናገድ አጋጣሚውን ብታገኝም ለታቀደው ግዙፍ ድግስ  መመጠን ባለመቻሏ መገናኛ 22 ማዞሪያ አካባቢ ትልቅ ቪላ ተከራዩ። ይህ ቤት የግቢው ስፋት ትልቅ ከመሆኑ የተነሳ የግቢው በር ሲከፈት በብዙ ዛፎች የተሞላና የአስፓልት መንገድ አንጂ ሌላ አይታይህም። እስፓልቱም ተዘርግቶ በዛፎቹ ውስጥ ተጠማዞ ይሰወርብሃል፣ ጭራውን ለመያዝ ተከተልከው ስትሄድ ሴሌሜ ሴሌሜ ካጫወተህ ቡሃላ ዋናው ቪላ በድንገት ከፊትህ ገጭ ይልብሃል። የሆነው ሆኖ በዚህ የቤተመንግስት ስፋት ባለው ቪላ ሰርጉ ተዘጋጀ። ለመትከል ቀናት የፈጀና ተሳቢ መኪና የሚያስዞር ሙሉ በሙሉ ነጭ የሆነ ድንኳን ተጣለ። ከግቢው ትልቅነት የተነሳ እንደ አከንባሎ የተጣለው ድንኳን የያዘው ቦታ ምንም ነበር። የባንድ የዲኮር የምግብ የመጠጡ ነገር አንደ ግቢው በሰፊው ለሰርጉ ተሰናዳ። በሚገርም ሁኔታ ሰርጉ ተከናወነ። ሰርጉ ደምቆ ቢያልፍም በማግስቱ ተያይዘው የመጡ ብዙ አደጋዎች አስከተለ። ወንድሜ ኪያር በዚህ ሰርግ ላይ ቀኑን በተከራየው ዳትሰን መኪና ሲያጅብ ውሎ። ለሌቱን ከጓደኞቹ ጋር ሮንድ ወጡ ለመጨፈር ከክለብ ክለብ ሲዞሩ አገር ሰላም ብላ ጥጓን ይዛ የተኛች ጎዳና ተዳዳሪ ላይ ወጥቶባት ደስታቸው ወደ ሀሰን ዳንሳቸው ወደ ሙሾ ተቀየረ። ታሰረ።በዋስ ተፈታ። የገጫትን ሴት እየተመላለሰ አስታመመ። ጠያቂ ዘመድ የሌላት ብቸኛ ሴት ነበረች። በስንተኛው ቀን ሞተች ይህን በተመለከተ አንድ ቀን ለአይን አባቴ ጋሽ ሼሂቾ ቂማ ላይ ስለገጫት ሴትዮ ይጠየቁት ጀመር…
"ሴትየዋ ሞተች?
"አዎ" አለ ኪያር።
"ወጣት ነች እንዴ?"
"አረ አይደለም አሮጊት ነች። እጅም እግርም የላት! በዛ ላይ አይነ ስውር ነበረች አለ።" ሙሉ ሰው አይደለም የገደልኩት በሚመስል ስሜት።
"ታዲያ መጀመሪይም የሞተች ነው የጨረስኩት አትለኝም።"
አፌን ደፍኜ መሳቅ ቃጥቶኝ በርቼ ፈርቼ ዋጥኩት።

     ሰርጉ በተከናወነ በሁለተኛው ቀን ማለትም ማክሰኞ ምሽት የመልሱ ድግስ ቀጠለ። ከከተማም ከክፍለ ሃግር ወዳጅ ዘመድ መጣ። ከነዚህም ውስጥ ሁሴን የተባለ ከአለታ ወንዶ የመጣው ዘመዳቸው ይገኝበታል። ሁሴን ለደጋሹ ቤተሰብ ቅርብ ዘመድ ስለነበር ከክፍለሃገር ቢመጣም ሲየስተናግድ አመሸ። ሰርገኛ ተበትኖ የተወሰነ ሰው ቀረ። ያትልቅ ቪላ በእንግዳ ሞልቶ  የምንተኛበት ክፍል አጥተን በረንዳ ላይ ተቀምጠን ለማደር ተገደድን። በረንዳ ላይ በተቀመጥንበት ሁሴን በምድጃ ከሰል ይዞ መጥቶ አያይዙልኝ አለ። ከሰሉን አያያያዝንለት። ማደሪያ ክፍል ማግኘቱን ነገረን። ነገር ግን ማንም ከኔ ጋር አይድርም ክፍሉ ቀዝቃዛ ስለሆነ ነው እሳት አቀጣጥዬ የምተኛው አለ። እባክህ አንተ ምታድርበት ክፍል አሳድረን የሚል ተማልኖ ከሁላችን ቢቀርብለት አይሆንም ብሎ ያቀጣጠልንለትን ከሰል ይዞ ሄደ። ሁሴን የሚያድራብት ክፍል ከዋናው ቪላ ማደዶ ተገንጥላ ለብቻዋ በጎጆ ቤት ቅርፅ  በግንብና በቆርቆሮ የተሰራች ቤት ነበረች። ይህቺ ቤት ለሰርጉ ድግስ ለመጡ መጠጦች እነደመጋዘንነት አግልግላለች። ሁሴን ከሰሉን ይዞ ወደዚህች ክፍል። ምድጃውን ከክፍሉ  አማካኝ ቦታላይ አስቀመጠው። የሚተኛበትን መኝታ አነጣጠፈ። ከብረት በሩ ስር የነበረውን ክፍት ሽንቁር ብርድ አንዳይገባ በሚል በጆንያ ዘጋውና ተኛ። እኛም ለሊቱን ስናወራና ስንስቅ ስነጫወት አነጋነው። ጠዋት ሰው መነሳት ሲጀምር።  በተነሳ ሰው ቦታ ላይ ደቀስን።

  … የሙሽሪት እናትና የሰርጉ ዋና ደጋሽ እትዬ አሚና። የሁሴን አርፍዶ መተኛት አሳስቧቸው ወደ ተኛበት የግንብ ጎጆ ሄዱ። በሩን ቆረቆሩ። መልስ የለም። በስሙ ጠሩት አሁንም መልስ የለም። ሰውዬው ምን ነካው? ሁሴን!  ሁሴን! አረ ሁሴን! " አሉት። ወይ ፍንክች። የማታውን የሁሴን ከሰል ይዞ መግባት ጠቆምን። ይህን ሰምተው ሰርግ ደጋሹ ቤተሰብ ተሸበረ። መስኮት ተገንጥሎ ለመግባት ታቀደ።  ይሄ ሁሉ ሲንጓጓ የሁሴን አለመንቃት በህይወት እናገኘዋለን የሚለው የሰው ምኞት ጠፋ። ምናልባት ራሱን ስቶ እናገኘው ይሆናል የሚለው ተስፋ አንሰራርቶ መስኮቱ በስንት ጔጔታ  ለመከፈት በቃ። አንድ ሰው ገብቶ ቢያይ ምድጃው ላይ የነበረው ከሰል ከስሎና አልቆ አመዱ ብቻ ቀርቷል፣ ሁሴንም በተኛበት ክልትው ብሎ ደርቆ ተገኘ። ወዲያው ለፓሊስ ተደውሎ ሪፖርት ተደረገ። ፖሊስ አንቡላስ ይዞ ከተፍ አለ። ካለው ልምድ በመነሳት ሁሴን የገደለው የከሰል ጭስ መሆኑን አስታውቆ ሬሳውን ለምርመራ ብሎ ይዞ ሄደ። ዋዜማውን በመልስ ድግስ በርቸስቸስ ብለው ያደሩ የሙሽሪት ቤተሰቦች። ማግስቱን ከምኒሊክ ሆስፒታል የተረከቡትን ሬሳ ኮንትራት በያዙት ካቻማሌ ጭነው ለሚስትና ለልጆቹ  እረፍቱን ለማርዳት ወደ አለታ ቀንዶ ሄዱ!። የሟች ከአንድ ቀን በፊት በጤንነቱ የተለያቸው ሰው ዛሬ ሬሳው ተጭኖ ሲመጣላቸው ምን ይል ይሆን!!አላህ ለሁሴን ጀነትን ይወፍቀው። ከማለት በቀር ምን ይባላል? በህይወቴ አሳዛኝ ከምላቸው ገጠመኞች ይሄ አንዱ ሆኖ አለፈ።አላህ ከንደዚህ አይነት ደስታ ተከትሎ ከሚመጣ ሀዘን ይጠብቀን።
ወገሬት!!

ሰላም ያሰፈኑ ዝናቦች

"ሰላም ያወረዱ ዝናቦች"

   ሰኔ 1/1997ዓ/ም ዕለቱ ረቡዕ ነው። ልክ የዛሬ አስራ አንድ አመት። (ጊዜው እንዴት ነው የሚሮጠው በፈጣሪ?)። በማለዳ ከእንቅልፌ የቀሰቀሰኝ የለቅሶ ድምፅ ሆነ። ከተኛሁበት በድንጋጤ ተነስቼ ወደ ለቅሶው ድምፅ እየሮጥኩ ወጣው። ከአንድ ቀን በፊት የሞተ የታች ሰፈር ሰው ለቅሶ ለመድረስ ከክፍለሃገር የመጡ ሀዘንተኞች በበራችን እያለቀሱ እያለፉ ነበር። ተመልሼ ወደ ቤት ገባሁና ዩኒፎርሜን ለባበስኩ። በእለቱ የ8ኛ ክፍል ብሔራዊ ፈተና ከሚፈተኑ ተፈታኞች አንዱ ነበርኩ። ቶሎ ቁርሴን በልቼ እርሳስና መቅረጫዬን ይዤ  ወደ ፈተና ሄድኩ። ሀገሬ በዚህ እለት ከረበባት ሊነሳ ይችላል የሚል የረብሻ ስጋት በተጨማሪ የብሄራዊ ፈተና ብቻ ሳይሆን ከመጀመሪያው አመኔታ አጥቶ የሚጠበቀውን የምርጫ ውጤት የሚገለፅበትና ብዙ ልጆቿን የምታጣበት ቀን ነበር። ጎጃም በረንዳ አካባቢ ከሚገኘው ሜይዴይ አንደኛ ደረጃ የህዝብ ት/ቤት በሰአቴ ደረስኩ። ከመፈተኛው ክፍል  በተሰጠን መፈተኛ ቁጥር መሰረት ወንበር ይዘን ተቀመጥን። ፈታኙ መመህር በቀጥራችን መቀመጣችንን ካረጋገጠ ቡሃላ ከብሄራዊ ፈተና ኤጀንሲ ታሽጎ የመጣውን የፈተና ኪስ ወረቀት እያየነው ቀደደና የፈተና ሽቶችን ለእያንዳዳችን ከፊት ለፊታችን ባለው ጠረጴዛ ላይ አስቀምጦልን ጨረሰ። የጀምሩ ደውል ሳይደወል ወረቀቱን መንካት እንደማንችል ገልፆልን መጠበቅ ጀመርን።    የፈተናውን መጀመር ከሚያበስረን ደውል በፊት የጦር መሳሪያ ድምፅ ተሰማን። መብራት ሄዶ በተኩስ ድምፅ እንድንጀምር የተተኮሰ አልነበረም። ሊነሳ ይችላል የሚለው ስጋት ስጋ ለብሶ በመከሰቱ እንጂ። ተኩሱ ተደጋገመ በረታ። ለፈተና የተቀመጥነው ተማሪዎች በሽብር ታመስን። በምርጫው ውጤት የመጣ ረብሻ መፈጠሩን ለማወቅ ነጋሪ አላሻንም።

  የተኩሱ ድምፅ አልቆም ሲል የመፈተኛ ክፍሎቻችንን ለቀን መውጣት ጀመርን። በግቢው ውስጥ መጯጯህ  መራበሽ በረታ። የግቢያችን የብረት በር ከውጪ በድንጋይ ተደበደበ። ውጡ የሚል መልዕክት ከአዲስ ከተማ ሁለተኛ ደረጃ ተማሪዎች የተሰጠ መልዕክት ነበር። የፈተና ወረቆተቻችንን በጀርባችን ወሽቀን ዉጪ ከሚረብሸው አካል ለመቀላቀል ወደ በሩ ሮጥን። በሩ ሳንደርስ አድማ በታኝ ፌደራል ፖሊስ ከፊታችን ገርገጭ አለብን። ወደ ላይ አንዴ ዷ… አድርጎ መሳሪያዉን ሲተኩስብን ሩጫችን ወደ ተቃራኒው ሆነ። ከኋላችን ከሚከተሉን ተማሪዎች ፍት ለፊት ተላተምን። ረብሻው በረታ። የመሳሪያው ድምፅ ከዚህም ከዚያም ተንበቀበቀ። ጧ…ጧ… ድድው… ቡው… ቅ…!። የት/ቤቱ  የግቢው በር በአድማ በታኝ ሀይሎች ተያዘ።ተማሪው አስወጡን ቢልም ሰሚ አጣ። ያለው አማራጭ በሩን የያዙትን ሀይሎች የድንጋይ ናዳ ማዘነብ ሆነ። አንዳንዱ ጎበዝ ተማሪ ጥጉን ይዞ ፈተናውን ይሰራል። (የፈተና ወረቀቱን ማን እንደሚቀበለው እንጃ!) ሴት ተማሪዎች ጥግ ጥግ ይዘው የተባራሪ ጥይት ለመሸሽ ተሸጉጠዋል። አብዛኛው ደግሞ ከረብሻው ለመቀላቀል በትጋት ድንጋይ ይወነጭፋል። ከውስጥ የሚዘንበውን የድጋይ ዶፍ ለማቆም አንዱ ፖሊስ በሩን ገርበብ አድርጎ ጭንቅላቱን አስገብቶ ቁልቁል አየ። በአንድ ጓደኛችን የተወረወረ ድንጋይ እየተምዘገዘገ ወደሱ መድረሱን ሲያይ ጭንቅላቱን አውጥቶ አሸሸ ድንጋዩ በሩን ጓ! አድርጎ ወደቀ። የተወረወረበት ፌደራል ፖሊስ የሽጉጡን ቃታ ስቦ በበሩ ላይ ተኮሰ። ጥይቷ የብረት በሩን ቦርድሳና ተወንጭፋ ጓደኛችንን ላይ…  ትረፍ ሲለው ጡንቻውን ብቻ በጨረፍታ አገኘችው። የጓደኛችንን ደም ስናይ ይበልጥ ተደናገጥን።

   በድንጋይና በጦር መሳሪያ የሚደረገው ጦርነት በከፍተኛ ዝናብ ምክኒያት ጋብ አለ። ይህን ዝናብና በሚያዚያ30 1997 በቅንጅት በጠራ  ህዝባዊ ሰላማዊ ሰልፍ ላይ የዘነበው ዝናብ ተመሳሰሉብኝ። ፈጣሪ ልጆቹ እንደያልቁበት በመለኮታዊ ሀይሉ ያወረዳቸው። ሰላም ያሰፈኑ ዝናቦች። ይህ ዝናብ ባይዘንብና ሁከቱ ባይቋረጥ ስንት ሰው ሊያልቅ እንደሚችል መገመት ይከብዳል።   በረብሻው ምክኒያት ብሄራዊ ፈተናችን ተቋረጠ። ረብሻውም በዝናብ ምክኒያት ቆመ። ሁከቱ ረገብ ማለቱን ተከትሎ የትምህርት ቤቱ በር ተከፍቶ ተለቀቅን። ወደ ውጪ ስንወጣ አስፓልቱ በድንጋይ ተሞልቶና ከዘነበው ዶፍ ጎርፍ ጋር ተደማምሮ የታረሰ መስክ መስሎ ጠበቀን። ሁላችንም በከፍተኛ ፍርሃትና ሽብር ጥግ ጥጉን ድክም ብሏቸው በቆሙ በተቀመጡ ታጣቂ ሀይሎች መሀል አለፍን፣ ከነሱ በራቅን ቁጥር ሰላማችን ሰፍኖ መሸበራችን እየቀነሰ መጣ። ከጓደኞቼ ጋር እስከ ቅያሳቸው እየሄድን በመጨረሻ ብቻዬን ቀርቼ ጉዞዬን ቀጠልኩ። ወደ ቤት። ዩኒፎርም መልበሴና የፈተና ወረቀት መያዜ በታጣቂ ሀይሎች ምንም ክፉ ነገር አይገጥመኝም በሚል ራሴን አሳምኜ ተረጋግቼ ብሄድም ከዚህም ከዚያም ቁስለኛም ሬሳም ጭነው ውር ውር በሚሉ አምቡላንሶች (ወግቶ ቅቤ መቀባት ይሉሃል ይሄ ነው) ድምፅ መሸበርና መደንገጤ አልቀረም። መንገድ አሳብሬ ነካሁት።

   ወደ ሰፈሬ ቅያስ የሚያስገባው መንገድ በታንክና በአግአዚ ወታደሮች ከመወረሩ በቀር ምንም የሚታየኝ ነዋሪ የለም። ብቻዬን ነኝ። … በሁለት ታንክ በአንድ ኦራል ዙሪያ ተበታትነው በቆሙ ሰላሳ በሚሆኑ ቀይ ቆብ ለባሽ አግአዚ ወታደሮች መሃል ተማሪ አይነኩም በሚለው በራሴ ሂሳብ ተማምኜ ምንም አይነት የፈርሃት ስሜት ሳይሰማኝ ወደፊት ተጠጋኋቸው። በቋንቋቸው ያወራሉ። መሀላቸውን ሰንጥቄ አልፌ ወደ ሰፈሬ የሚያስገባውን ቀጭን መንገድ ያዝኩ። ከምቅፅበት የሚሰማኝ ድምፃቸው ጠፋና ቋ… ቋ… ቋ የሚለው የራሴ ኮቴ ብቻ ተሰማኝ። ከቅፅበታዊ ፀጥታቸው ጋር ተያይዞ አንዳች የስጋት ስሜት መላ አካሌን ወረረኝ። ሸከከኝ። ቀጭኗን መንገድ ጨርሼ ልታጠፍ ስል ዞሬ አየዋቸው። ጠላታችሁ አንዲህ ክው ይበል!! ልቤ በድንጋጤ ሁለት ቦታ የተሰነጠቀች ነው የመሰለኝ። ለካ ያሁሉ ወታደር ወሬውን ያቆመው ድፍረቴ ገርሞት አፍጥጦ አያየኝ ነበር። ከመካከላቸው አንዱ "በትግርኛ ቅላፄ …እንዳትበላሽ!" አለኝ ሌባ ጣቱን ቀስሮ እያወዛወዘብኝ… ከራቅኩ ቡሃላ  ድንጋይ የምወረውርባቸው መስሎት። እንዴት በሩጫ ቀጭኗን መንገድ እንዳተጠፍኩ አትጠይቁኝ። በሩጫ ታጥፌ ወደ ግቢ በር በሶምሶማ ስጠጋ። ሰው ሁሉ ገብቶ ታላቅ ወንድሜ ሌላ ጊዜ ከት/ቤት የምመለስበት ጎዳና ላይ አይኑን ተክሎ እየተቁነጠነጠ ይመለከታል። ስጠጋው ኮቴዬን ሰምቶ ዞረ። ሲያየኝ ትልቅ እፍይታ እንደተሰማው ከፊቱ ገፅታ ተመለከትኩ። በደንብ ስቀርበው ቀድሞኝ ገባና የግቢያችንን በር ይዞ ጠበቀኝ። ከገባው ቡሃላ በሩን ዘግቶ ተከተለኝ…

  "አንተ አንተ የምን ደም ነው ሹራብህ ጀርባ ላይ?"አለኝ።

"የምን ደም ኧረ እኔንጃ!" አልኩት።

"መቱህ እንዴ?" በድንጋጤ ነው የሚጠይቀኝ።

"አረ በጭራሽ"  አልኩት።

ታዲያ የምን ደም ነው?" ሹራቡን አወለኩ እውነትም ጀርባው ላይ ደም አለ። ምንም የሆንኩት ነገር የለም። ወንድሜ አካሌን ባለማመን ተጠግቶኝ ይመረምራል። ደሙ ት\ቤት ግቢ ውስጥ ጡንቻው በጨረፍታ የተመታው የጓደኛችን መሆኑን ነገርኩ ትና ተረጋጋ።  በዛው ቀን ከምሳ ሰአት ቡሃላ ፈተና እንዳለ ኔትወርክ እንደተለቀቀ ደውዬ አረጋገጥኩ። ሹራብ ቀይሬ ድጋሚ ወወደ ት/ቤት ሄድኩ። በመጠኑም ቢሆን የመረጋጋት ስሜት ሰፍኖ ነበር። የመሳሪያ እሩምታዎችም ከዝናቡ ቡሃላ ቆመው ነበር። ያለ መፈተኛ ቁጥር በዘፈቀደ ተቀምጠን መፈተን ጀመርን። ከሁላችንም ኋላ እንደኛው ለመፈተን የተቀመጡ ሁለት የማናውቃቸው ሰዎች ተቀምጠዋል። አስተያየቱ በሚደብር ፈታኝ እየተፈተንን ሳለን የት\ቤቱ ዳይሬክቶር ወደምንፈተንበት ክፍል ገብቶ ከተማሪዎች እየመረጠ ትከሻችንን እንደመደገፍ እጁን አያስቀመጠብን "ፈተና እንዴት ነው?" እያለ እኔን ጨምሮ ወደ አሰራአንድ ተማሪዎችን ጠየቀን። ነገሩ የተገለፀልኝ ፈተናው ካለቀ ቡሃላ ነበር። ለካ ዳይሬክተራችን ለፈታኛችንና ከኋላችን ለሚፈተኑ ሁለት ሲቪል ፖሊሶች እየጠቆመ ኖሯል። ፈተናውን ጨርሰን መውጣት ጀምርን። በዳይሬክተራችን ከተጠቆምነው ልጆች በምን ተአምር እኔ እንደተረፍኩ ባላውቅም ሌሎቹ በሙሉ እየተያዙ ቤሮ ተቆለፈባቸው። ኦራሉ መኪና ሲመጣ ወደ ዝዋይ ጫኗቸው። በተአምር መትረፌ እየገረመኝ ቶሎ ብዬ ወደቤት ሄድኩ። ዝዋይ የተጫኑ ጓዶቼ የማግስቱ ፈተና ስላመለጣቸው ስምንተኛ ክፍልን ለመድገም ተገደዱ። በረብሻው የተቋረጠው የጠዋቱ ፈተና አማርኛና እነወግሊዝኛ ፈተና ከወር ቡሃላ በድጋሚ ተዘጋጅቶልን ተፈተንን። የሰኔ አንድ 1997 ውሎዬ ይህን ይመስል ነበር።
ወገሬት!!